Државната изборна комисија го започна јавниот увид во Избирачкиот список на 23 август, клучен процес кој гарантира дека секој граѓанин ќе може да го оствари своето право на глас.
По распишувањето на изборите, Министерството за внатрешни работи ги достави податоците за граѓаните до ДИК, вклучувајќи единствен матичен број (ЕМБГ), за да се обезбеди точноста на Избирачкиот список. Јавниот увид започнува ќе трае до 11 септември, на полноќ.
МВР на 12 септември доставува, листа на државјани кои поднеле барање за издавање нова лична карта или патна исправа по било кој основ од денот на распишување на изборите до денот на завршување на јавниот увид и листа на лица кои ќе наполнат 18 години до денот на изборите. ДИК податоците за овие лица ги впишува во Избирачкиот список по службена должност.
Во овој период, граѓаните можат да поднесуваат барања за запишување, дополнување или бришење на податоците во избирачкиот список. Барањата се поднесуваат писмено во подрачните одделенија на ДИК, месните канцеларии, или по електронска пошта, а при тоа треба да се приложат потребните докази.
Лицата во притвор или затвор, како и оние кои користат услуги на установи за вонсемејно згрижување, ќе имаат посебен пристап до увид во Избирачкиот список, со посредство на надлежните органи.
ДИК е должна да одлучи по барањата во рок од 24 часа, додека против одбивањето на барањето граѓанинот или политичката партија може да поднесе тужба до Управниот суд, кој исто така треба да одлучи во рок од 24 часа.
По завршувањето на јавниот увид, политичките партии ќе добијат увид во Избирачкиот список, а ДИК ќе изврши сите неопходни промени и ќе го заклучи списокот најдоцна на 26 септември. Потпишаниот и финализиран Избирачки список ќе биде достапен најдоцна на 3 октомври, пред денот на изборите.
Подрачните одделенија на ДИК, чии адреси се објавени на веб страната на Комисијата, и кои ќе бидат отворени од 8 до 20 часот непрекинато и за викенд и за празници. Последниот ден од увидот на 11 септември подрачните одделенија на ДИК ќе бидат отворени до полноќ.
Според информациите на ДИК заклучно со 28 август, 1712 граѓани направиле увид во Избирачкиот список , еден граѓанин поднел барање за запишување во Избирачкиот список, 19 лица поднеле барање за промена на личните податоци во Избирачкиот список и едно лице побарало бришење.
За гласачите е битно да знаат дека ДИК е надлежна според Изборниот законик да ги заштити податоците од Избирачкиот список кои не смеат да се употребуваат за ниедна друга цел, освен за остварување на гласачкото право на граѓаните. Законот предвидува регистрираните политички партии, коалициите и независните кандидати, односно овластените претставници и нивните заменици на подносителите на листа на кандидати да не можат да ги користат Избирачките списоци на денот на изборите за евидентирање на лицата кои гласале.
