Предлог-декларацијата за одржување на фер, слободни и демократски избори за членови на советите и за градоначалници на општините и на градот Скопје поднесена од претседателот на Собранието Африм Гаши е на денешната седница на Комисијата за политички систем и односи меѓу заедниците. Предлог-декладарацијата е на дневен ред и на собраниската Законодавно правната комисија.
Во Предлог-декларацијата, објавена на собраниската веб-страница, се посочува дека во пресрет на изборите што ќе се одржат на 19 октомври, Собранието го изразува своето натпартиско единство за одржување на фер, слободни и демократски избори. Се посочува дека Собранието се залага за доследно почитување на уставното право, граѓанинот да го оствари своето избирачко право непосредно, на слободни избори со тајно гласање, а најостро го осудува семејното и групното гласање, како можност за манипулирање со гласовите на граѓаните и влијание врз изборните резултати.
– Собранието дава целосна поддршка на Државната изборна комисија и на другите органи и институции за организирање и спроведување на фер, слободни и демократски избори преку обезбедување услови за слободно изразување на волјата на граѓаните, без страв, притисок, дискриминација, закани или манипулации. Дава целосна поддршка за обезбедување независно и ефикасно набљудување на целиот изборен процес, од страна на домашните и странски организации, здруженија и медиуми, согласно закон, правилата за набљудување на изборите на Државната изборна комисија и меѓународните стандарди. Укажува на потребата од фер и демократска изборна кампања, при што го нагласува значењето на политичката толеранција и почитта меѓу различните политички и идеолошки опции на учесниците во изборниот процес и во таа насока особено го осудува говорот на омраза, насилството и дискриминацијата. Укажува на значењето на значењето на медиумите и на медиумското претставување, при што го нагласува значењето на учесниците во изборната кампања за промовирање на нивните кандидати, политики и ставови. Во оваа насока ја нагласува потребата од обезбедувањето фер пристап до медиумите на сите учесници во кампањата, а најостро ги осудува кампањите што шират дезинформации и невистини, со цел да се дискредитира некоја личност, институција, политичка партија или организација, пишува во Предлог-декларацијата.
Како што се посочува во Предлог-декларацијата, се осудува секаков облик на изборна корупција, злоупотреба за партиски цели на државни ресурси и институции, поткуп и уцени и било какво друго однесување на учесниците со кое може да се доведе во прашање почитувањето на демократските вредности и стандарди во целиот изборен процес.
Гаши на последниот понеделнички брифинг со новинарите ја најави Предлог-декларацијата, која се очекува да биде изгласана на пленарната седница закажана за 12 септември.
– Мислам дека тоа ќе биде добра и позитивна порака до граѓаните од сите политички актери дека се обврзале на фер и демократски избори. Ако се потпишат сите координатори на пратеничките групи, на седницата на 12 септември ќе биде ставена на дневен ред. Декларацијата е со општи теми. Повикуваме на фер и демократски избори, сите актери да се обврзат да се придржуваат до законите за да има фер и демократски избори. Штом ќе се договориме за текстот, пред да биде донесена, ќе ја пуштиме до вас медиумите за да ја видите, рече тој.
Гаши нагласи дека со Декларацијата како Собрание ќе испратат посилна порака и до граѓаните и до сите политички актери.
– Мислам дека првпат се работи за ваква Декларација. Јас ја видов хронологијата на декларациите. Мислам дека е побитно ако испратиме порака од страна на Собранието, отколку кога политичките партии одат во ДИК и ги потпишуваат. Пораката ќе биде посилна, пообврзувачка, кога ќе се донесе на пленарна седница. Мислам дека сите ќе бидеме поодговорни ако ја донесеме во Собрание. Една интенција плус, намера плус да дадеме тежина на тие демократски избори, рече тој.
