ЦИВИЛ ексклузивно дознава дека рускиот амбасадор Сергеј Баздникин се обиде да ја присвои функцијата „декан на дипломатскиот кор“ во земјава. Но неговиот обиде беше осуетен. Што се случи?
Баздникин, според извори на ЦИВИЛ, неодамна упати нота со која го информира македонското МНР и дипломатскиот кор во земјава дека – по завршувањето на мисијата на словачкиот амбасадор Хенрик Маркус на 31 јули 2025 година – функцијата Декан на Дипломатскиот кор во Северна Македонија ја презема тој „согласно редот на приоритет“, како што наведува во нотата.
Во истражувањето на овој дипломатски скандал, ЦИВИЛ ексклузивно дојде до информации дека во одговорот на македонското МНР се вели дека министерството ги признава одредбите од долгогодишната традиција според која деканот на Дипломатскиот кор се назначува врз основа на редоследот на претходници меѓу шефовите на мисии, во духот на колегијалноста, меѓусебното почитување и конструктивната соработка меѓу сите дипломатски мисии.
Но, додаваат од македонското МНР, ефективното функционирање на улогата на деканот критично зависи од способноста за поттикнување на инклузивен дијалог, транспарентност и координација меѓу сите шефови на мисии, и следствено на тоа, сметаат дека, во сегашните околности, овие услови не се доволно исполнети за да се обезбеди исполнување на одговорностите поврзани со функцијата декан на начин што го одразува единството и колегијалниот дух на Дипломатскиот кор во Република Северна Македонија и што обезбедува непристрасно и објективно артикулирање на ставовите на сите членови на Дипломатскиот кор.
Понатаму, во одговорот се вели дека „во овој поглед и по внимателно разгледување и темелно разгледување на ситуацијата, Министерството за надворешни работи и надворешна трговија на Северна Македонија со почит сака да ја информира Амбасадата на Руската Федерација во Македонија дека преземањето на функцијата декан од страна на Неговата Екселенција, амбасадорот на Руската Федерација, г-дин Сергеј Баздникин, во овој момент не ужива потребна кохезија и широка поддршка меѓу дипломатската заедница во Република Северна Македонија, се вели во нотата на МНР НТ“.
За потсетување, државата во која амбасадорот на РФ, Сергеј Базникин се обиде да ја преземе функцијата Декан на Дипломатскиот кор од страна на РФ е означена како непријателска земја. Неговиот обид, пак, за узурпирање на оваа функција, не отстапува ни најмалку од неславниот дипломатски стил на државата што ја претставува.
Драган Мишев, во соработка со Тимот на ЦИВИЛ за мониторинг на хибридните закани (ЦХТМ)
