Изборната кампања за локалните избори во октомври влегува во фаза на засилени судири, каде што кандидатите на коалицијата ВЛЕН и Алијансата за национална интеграција (АНИ) предводена од ДУИ си разменуваат жестоки обвинувања и политички предизвици.
Во Чаир, кандидатот на АНИ, Бујар Османи, го обвини својот противкандидат од ВЛЕН, Изет Меџити, дека никогаш искрено не го доживеал Чаир како свој дом, туку како средство за добивање високи позиции во Владата. Османи предложи „нотаријална спогодба“ – ветување дека нема да ја напушти функцијата градоначалник, без разлика на понуди за министерска фотелја, сè додека не биде сменет со глас на граѓаните.
– Истото нека го потпише и Меџити: ако изгуби, веднаш да поднесе оставка. Тоа е прашање на политички морал, порача Османи, наведувајќи примери од минатото кога Теута Арифи, Невзат Бејта и Зеќирија Ибраими се откажале од државни функции за да се кандидираат за локални избори.
Од другата страна, Изет Меџити возврати со силна критика, нарекувајќи го Османи „човек на Соравиа“ и „министер кој оди во Будимпешта за да го врати Груевски“.
– Разликата е јасна – јас ја оставив Владата за Чаир, а тој го користи Чаир како чекорница за лични позиции, изјави Меџити на отворањето на изборниот штаб.
Тој најави големи образовни инвестиции, меѓу кои изградба на две нови основни училишта.
– Не сакаме веќе Чаир да биде заглавен во канализации и јасли, туку да зборуваме за универзитетски кампуси и квалитетно образование, додаде тој, ветувајќи вложувања од 30 милиони евра за универзитетски кампус.
Слична конфронтација се случува и во Тетово. Кандидатот на АНИ, Бајрам Реџепи, го обвини актуелниот градоначалник и кандидат на ВЛЕН, Биљал Касами, дека го гради булеварот „Борис Кидрич“ без дозвола и спротивно на стандардите.
– Станува збор за кривично дело според член 244-А од Кривичниот законик, со казна затвор од 3 до 8 години, изјави Реџепи, повикувајќи ја Јавното обвинителство да отвори истрага.
Од кабинетот на Касами реагираа остро, доставувајќи документи дека постои градежна дозвола и дека сите процедури се почитувани.
– Ова е обид на кандидатот Реџепи да покрие сопствена празна програма. Тој шета по улиците само за да биде присутен во медиумите. Ќе поднесеме тужба за клевета ако не се извини јавно, порачаа од општината.
Судирите во Чаир и Тетово се сметаат за клучни тестови за поддршката меѓу ВЛЕН и АНИ (ДУИ), особено што двете страни меѓусебно се обвинуват за „измени на имиња на коалиции“, „масовни префрлања на членови“ и „корупциски практики“.
Според аналитичарите, ваквите јавни конфронтации ја потврдуваат високата политичка влоговност на албанските партии на локално ниво, а граѓаните ќе одлучат на 19 октомври кој од кандидатите ќе ја добие довербата.
Дестан Јонузи / Фронтлајн
