🎙️ Светот изгледа како мапа на настани што се надоврзуваат еден на друг без ред и логика. Деновите се долги, а секој нов настан ја засилува перцепцијата дека живееме во глобален хаос – мешавина од дипломатски пресврти, војни, страдања, воени закани и историски парадокси.
Велика Британија, Канада, Франција, Австралија, Португалија и уште неколку се приклучија на земјите што ја признаа државата Палестина. За едни ова е чекор кон правда и мир, за други сигнал за нови поделби. Но, без оглед на перспективата, останува фактот дека глобалната дипломатија минува низ тектонски промени.
Демократијата во Молдавија уште еднаш се најде под удар на Москва. Изборите таму се таргетирани со дезинформации, влијание и политички инженеринг. Молдавија е мала држава, но важна шаховска фигура во регионалната безбедносна архитектура – и токму затоа е под постојан притисок од Кремљ.
ЕУ се обидува да создаде заеднички „Ѕид на дронови“ – нов безбедносен механизам против современите воздушни закани од Русија. Но на масата не беа поканети Словачка и Унгарија. Причината е очигледна: нивните врски со Москва веќе одамна преминаа во – најблаго кажано – политичка компликација што Брисел не може да ја игнорира, особено во еден ваков клучен безбедносен момент за целиот континент.
Кијив останува центарот каде што се судираат надежта и неизвесноста. Европа и светот внимателно гледаат кон Украина, знаејќи дека исходот на војната ќе влијае врз иднината на целиот континент. Во меѓувреме, Доналд Трамп повторно успеа да и сврти рефлекторите на светската јавност кон себе и се погрижи да ја задржи титулата „главен актер во глобалната трагикомедија“. Откако се прогласи за миротворец кој наводно ја запрел „војната меѓу Камбоџа и Ерменија“, како и „војната меѓу Азербејџан и Албанија“ (да, таква комбинација дури и на географска карта е тешко да се најде) тој направи салто мортале и го смени мислењето за Украина и Зеленски. Сега, тој верува во Кијив и Зеленски – Украина може да се ослободи целосно. До кога ќе го задржи овој став останува прашање од милијарда долари, но извесно е дека може да се очекуваат драстични промени на светската сцена – не многу поволни за Москва.
Од Палестина до Кијив, од Молдавија до Брисел и Вашингтон, секој ден нуди нова епизода од глобалниот хаос. Нема пауза, нема јасен правец. Но токму затоа е важно луѓето да останат будни, да ја препознаваат пропагандата и да бараат одговорност од оние што ги држат лостовите на моќта во овој несреќен спектакл.
Џабир Дерала и Драган Мишев
Камера и монтажа: Ариан Мехмети
