Владата на САД им ги одзеде визите на најмалку 50 политичари и владини претставници во Мексико, во услови на репресија на администрацијата на Трамп против нарко-картелите и нивните осомничени политички сојузници, според двајца мексикански функционери, објави Гардијан.
Овој потег испрати тивки шок-бранови низ политичката елита на Мексико, која редовно патува во САД. Исто така, означува значително проширување на американската анти-нарко-акција, при што администрацијата на Трамп ги таргетира активните политичари кои обично се сметаат за премногу дипломатски чувствителни.
Неколку од овие случаи беа објавени, но извештаите покажуваат дека откажувањата на визите се многу пораспространети отколку што претходно беше објавено.
Според тројца поранешни амбасадори на САД, претходните администрации ги одземале визите на овој начин – но не во ист степен, што според нив е показател за подготвеноста на Доналд Трамп да го користи дипломатскиот инструмент за да ги постигне политичките цели.
„Администрацијата на Трамп наоѓа нови начини да изврши поголем притисок врз Мексико“, рече Тони Вејн, амбасадор на САД во Мексико од 2011 до 2015 година.
Еден од изворите, висок мексикански политичар, рече дека на повеќе од 50 политичари од владејачката партија Морена им се одземени визите, како и десетици функционери од други политички партии. Изворите побараа анонимност за да зборуваат за чувствителна тема, пишува Гардијан.
Досега, само четворица јавно потврдија дека ги изгубиле визите, вклучувајќи ја и гувернерката на државата Баја Калифорнија, Марина дел Пилар Авила, која категорично негираше какви било врски со организираниот криминал.
САД не треба да даваат објаснувања за одземање на нечија виза, а прагот за тоа е многу помал отколку за воведување санкции или гонење.
Споредф Гаридјан, како одговор на барањето на Ројтерс за коментар, висок функционер на американскиот Стејт департмент рече: „Визите, вклучително и оние што ги поседуваат странски функционери, може да бидат одземени во секое време“ за „активности што се спротивни на националниот интерес на Америка“.
„Администрацијата на Трамп имаше добри работни односи со владата на Шајнбаум и со нетрпение очекуваме да продолжиме да ги унапредуваме нашите билатерални односи во интерес на агендата за надворешна политика „Америка на прво место“, додаде функционерот.
Претседателството на Мексико и мексиканското Министерство за надворешни работи не одговорија на барањата за коментар.
Администрацијата на Трамп, исто така, ги поништува визите на други места во Латинска Америка против перцепирани политички и идеолошки непријатели.
Д. Т.
