На само три дена до локалните избори, кандидатите за градоначалници и советници во различни општини со забрзано темпо на бројни средби, митнизи и видео обраќања ги презентираат своите програми и ветувања за подобрување на квалитетот на животот на граѓаните, но и ветувања европска иднина на државата.
Османи добил директна порака од висок претставник на ЕУ дека се очекува новата влада да ги спроведе уставните измени веднаш по изборите
Кандидатот за градоначалник на Општина Чаир, Бујар Османи, вечерва на собирот во Чаир откри дека добил директна порака од висок претставник на ЕУ, со која се потврдува поддршката од Брисел за европскиот пат на државата и очекувањето дека новата влада ќе ги спроведе уставните измени веднаш по изборите во октомври.
„Еден важен пријател од Брисел денес ме извести, и со одговорност го кажувам ова пред вас, ми рече: прашај го Али Ахмети и лидерите на НАИ дали можат да се обврзат пред Брисел дека веднаш по октомври, кога ќе се формира новата влада, ќе се обврзе за уставните измени“, рече Османи.
Филипче со порака од Гостивар – Апстиненција од гласање не е казна за СДСМ — тоа е награда за режимот на ВМРО
Лидерот на СДСМ, Венко Филипче вечерва од трибината организирана оо рамки на предизборната кампања порача дека овие избори се од исклучителна важност за иднината на граѓаните и за напредокот на државата. дека Гостивар знае дека силата е во заедништвото, а не во поделбите.
Ова не е време за молк, ова е време за исправување. Апстиненцијата не е казна за СДСМ — тоа е награда за ВМРО. Секој изгубен глас е добивка за режимот што повторно го чувствуваме, порача Филипче.
Висар Адеми со пет главни ветувања во Гостивар
Независниот кандидат за градоначалник на Гостивар, Висар Адеми и неговиот тим, денеска ги претставија петте главни ветувања.
– Чистење од корупција, транспарентна администрација, професионалците ќе ги заменат партиските вработувања и процесите ќе бидат дигитализирани за целосна отчетност, беше кажано на презентацијата на градскиот плоштад.
Гоцевски, кандидат за градоначалник на ВМРО-ДПМНЕ, ќе се бори за една заедница, еден народ во Делчево
Кандидатот за градоначалник на Делчево од ВМРО-ДПМНЕ и Коалицијата „Твоја Македонија“, Иван Гоцевски, на вечерашниот митинг во Делчево ја претстави својата визија и програма за развој на општината, истакнувајќи дека „времето на Делчево е тука“ и дека граѓаните заслужуваат чесно, одговорно и посветено раководење. Една заедница, еден народ – обединети со многу енергија, со светла визија и решителност. Делчево мора да успее!
Касами со порака до младите: Вие самите треба да го трасирате сопствениот пат
Градоначалникот на Тетово, Билал Касами, учествуваше на панел-дискусијата „Гласот на младите во одлучувањето“, што се одржа на плоштадот „Илирија“ во Тетово, во организација на Младинскиот форум. Во своето обраќање, Касами истакна дека неговата посветеност останува насочена кон создавање можности преку кои младите ќе можат целосно да го остварат својот потенцијал.
Тој го спомена носителот на советничката листа, Алби Ќамили, како и директорот на ЈП „Шари“, Валон Зеќири, како двајца млади луѓе на кои им е дадена шанса во рамките на Општина Тетово. Касами ги повика младите да бидат свесни дека во одредени моменти од животот ќе треба самите да го трасираат својот пат.
Б. Ј.
