До каде сме во однос на демократијата во партиите- до никаде. Нема ниту статус- кво. Има назадување, со секоја нова гарнитура на внатрепартиски политички раководства, кои за единствена цел имаат„ како да станам премиер, министер или државен функционер“, за да дојдам до основната мотивација, а тоа е службена картичка, тендери и коли, секретарка и телефон. Тоа се основните мотиви кои ги држат во кондиција, и затоа се добри клиентелисти. Дури и лојалисти, се додека можат да ги остваруваат своите интереси, изјави Оливер Андонов, професор на Воената академија, на панел дискусијата на ЦИВИЛ – „Демократско назадување: Импликации и последици“.
Андонов вели дека во партиите не треба да бараме демократија, и посочува дека е трагично што во партиите не можеме да бараме дури ниту идеолошки пристап, што е причина за достигнување на дното на нашата политичка сцена.
Пристапот кон демократизација на политичките партии, а нормализацијата на општеството, што е клучен аспект, бидејќи политичките партии ја креираат практичната политика во владата, бидејќи ние имаме коалициона влада од повеќе партии, такви какви што се тие недемократски капацитети во политичките партии, таква е и владата. И затоа, да не не изненадува што некој сака да го смени системот.
За петнаесет месеци влада, немаме ниту еден закон што ќе го подобри животот на граѓаните, што и не мора да биде демократски закон, но да го подобри животот на граѓаните по определено прашање, посочува Андонов.
Проф. Андонов се осврна на негативноста што ја предизвикуваат политичките актери, не само кај нас туку и низ светот, истакнувајќи ја посебно негативноста кон НАТО, ЕУ, дури и поддршката на нашата држава за Украина, за која вели дека е толку „падната“ и постави прашање – што последната година Северна Македонија направила за да ја поддржи Украина.
Многу сум убеден, дека поголем таргет на македонските сигурносни служби сме ние кои сме денес тука, отколку реалните извори на загрозување на државата, и оттука сметам дека една од основните задачи кои треба да ги имаме а можеби и да извлечеме заклучок од сето тоа, е демократизација на партиите и политичките структури, порачува Андонов.
Д. Тахири
Камера: Атанас Петровски
Монтажа: Ариан Мехмети
Фотографија: Б. Јордановска – ЦИВИЛ
Панелот е дел од меѓународната конференција “Одбрана на демократијата: Боиште на вистината“, како дел од проектот „Демократски навигатор“, поддржан од Сојузното министерство за надворешни работи на Сојузна Република Германија.
