Одѕивот на локалните избори до 09:15 часот е три отсто, а гласале 41 890 граѓани. Гласањето, според ДИК, досега се одвива непречено, без никакви проблеми, освен на две избирачки места (едното во Куманово и другото во Штип) каде поради технички причини гласањето се одвива без биометриска идентификација, туку со УВ спреј и УВ ламба.
На гласачкото место 1133 во Куманово каде се запишани 12 гласачи немало струја, гласањето се одвива без уред за биометриска идентифација, а на гласачкото место 2271 во Штип каде се запишани 507 гласачи лица од ИТ од ДИК направиле обид со два резервни уреди но не можел да стартува уредот за биометриска идентификација.
– Гласањето до овој момент се одвива без никакви потешкотии и проблеми и дојави од изборните органи за било какви проблеми. Минатата година за време на парламентарните избори имавме вакви ситуации за вкупно шест избирачки места каде донесовме одлука поради објективни причини гласачњето да се одвива без уред за биометриска идентификација, рече претседателот на ДИК Борис Кондарко на првата прес-конференција на ДИК.
Според обработените податоци на ДИК, во Битола излезноста е 3,38 проценти, Богданци 4,68 проценти, Боговиње 1,29, Бутел 3,63, Вевчани 5,2, Врапчиште 0,87, Гевгелија, 4,37, Гостивар 1,71, Градско 5,61, Делчево, 4,11, Демир Капија, 5,37, Дојран 5,06, Зеленикот 5,62, Карпош 3,09, Кисела Вода 3,65, Кичево, 2,35, Кратово, 5,13, Куманово 1,91, Липково, 2,02, Лозово 6,36, Ново Село 5,5, Охрид 2,82, Прилеп, 3,41, Пробиштип 6,64, Ресен 5,1, Сарај 2,46, Струмица, 3,92, Студеничани 1,85, Теарце 1,90, Тетово 2,08, Центар 2,84, Штип 3, Шуто Оризари 2,17.
Кондарко информира и дека ДНЕТ има поднесено тужба до Управниот суд кој одлучил дека одлуката на ДИК е потврдена.
– Тоа значи дека сите евентуалнио гласови за советничка листа на град Скопје дадени за оваа партија ќе се сметаат за неважечки, рече Кондарко.
На денешните избори се гласа на 3 474 избирачки места, на кои до 19 часот правото на глас можат да го искористат 1 832 415 граѓани.
Согласно одлуката на ДИК, а заради поголема транспаретност при броењето на гласовите треба да бидат присутни сите членови на ОИК, односно петте члена и нивните заменици.
Државната изборна комисија ќе има прес-конференции на секои два часа, а првичните неофицијални резултати се очекуваат околу полноќ.
На локалните избори 2025 има вкупно 309 кандидати за градоначалници и 576 листи за членови на општинските совети со вкупно 10 490 кандидати, пренесе МИА.
