Британскиот премиер Кир Стармер кажа во британскиот парламент дека рускиот олигарх Роман Абрамович имал последна шанса да ги донира приходите од продажбата на фудбалскиот клуб Челзи за кауза во Украина, како што вети, пренесува Кијив Индипендент.
„Часовникот отчукува за Роман Абрамович да ја почитува обврската што ја презеде кога беше продаден ФК Челзи и да ги префрли 2,5 милијарди фунти (3,4 милијарди долари) за хуманитарна кауза за Украина“, рече Стармер на 17 декември.
Абрамович го продаде клубот во 2022 година, кога Велика Британија го санкционираше по целосната инвазија на Русија во Украина поради неговите блиски врски со Кремљ. Трансакцијата беше одобрена од Велика Британија, откако Абрамович докажа дека нема лично да има корист од продажбата.
Олигархот во тоа време вети дека ќе ги искористи приходите од продажбата „во корист на сите жртви на војната во Украина“.
Но, средствата оттогаш останаа замрзнати на банкарска сметка во Велика Британија поради различните ставови за тоа како треба да се потрошат парите. Велика Британија тврди дека средствата треба да се користат исклучиво во Украина.
Владата на Велика Британија денес издаде лиценца со која се дозволува мобилизирање на парите. Условите на лиценцата наведуваат дека средствата мора да бидат наменети за хуманитарни цели во Украина, според соопштението за медиумите на британската влада.
Абрамович ќе мора да се согласи со условите на лиценцата за да може трансферот на парите да продолжи.
Владата изјави дека ќе разгледа и какви било алтернативни предлози што Абрамович ги има за доброволно да ги донира парите на Украина.
„Ако не дејствува, тогаш сме подготвени да направиме што е потребно за да се осигураме дека парите ќе стигнат до украинскиот народ“, рече британската канцеларка Рејчел Ривс во соопштението за медиумите.
Стармер му рече на Долниот дом дека Велика Британија е подготвена да оди на суд за „секој денар да стигне до оние чии животи се растргнати од нелегалната војна на Путин“.
Овој потег доаѓа во пресрет на клучниот самит на ЕУ во Брисел, каде што европските лидери ќе ја одредат судбината на „заемот за репарација“, кој би можел да види до 210 милијарди евра позајмени на Украина, поддржани од замрзнати руски средства.
Европскиот план се разликува по тоа што би ги искористил суверените средства што ѝ припаѓаат на руската централна банка, наместо да ги користи замрзнатите средства на приватни лица.
Абрамович беше сопственик на фудбалскиот клуб Челзи од 2003 до 2022 година.
М. Д.
