Студенти сместени во студентскиот дом „Гоце Делчев“ во Скопје се жалат на појава на стаорци, недостиг на топла вода и проблеми со функционирањето на лифтовите, објави Студентарија.мк на социјалните мрежи, а случајот го пренесоа повеќе медиуми. Според студентските сведоштва, глодари веќе се појавиле и на повисоките катови од блокот, што дополнително ја зголемува загриженоста за хигиенските и безбедносните услови во домот, пренесува Meta.mk.
Студентите велат дека, наместо институционално решение, биле принудени самите да се справуваат со проблемот. Дел од нив со сопствени средства купиле лепак против глувци и го поставиле во собите, во обид да се заштитат од глодарите. Ова сведоштво отвора сериозно прашање за тоа каде завршува одговорноста на студентите, а каде почнува одговорноста на надлежните институции и управата на домот.
Покрај проблемот со стаорците, студентите од блокот Б пријавуваат дека немаат топла вода. Поради тоа, дел од нив биле принудени да се капат кај пријатели и роднини. Во исто време, студентите се соочуваат и со доцнење на исплатата на осмата рата од државните студентски стипендии, што дополнително го влошува нивниот секојдневен живот и финансиска сигурност.
Случајот со „Гоце Делчев“ не е изолиран инцидент. ТВ Телма потсетува дека и претходно известувала за проблеми со лифтовите во овој студентски дом, а во јуни 2025 година Универзитетското студентско собрание при УКИМ бараше да се средат лифтовите, наведувајќи дека од осум лифта работеле само четири, што е сериозен проблем за високи објекти во кои живеат студенти.
Состојбата со студентските домови во оваа академска година е проследена со низа скандали: глувци во студентскиот дом „Пелагонија“, проблеми со струја и топла вода во студентскиот дом во Охрид, како и мувлосани бањи и несоодветни оброци во штипскиот студентски дом. Овие случаи не укажуваат само на поединечни пропусти, туку на поширок системски проблем во третманот на студентскиот стандард.
Во исчекување останува и отворањето на двата студентски дома во Скопје – „Кузман Јосифовски Питу“ и „Стив Наумов“ – за кои претходно беа дадени најави дека ќе бидат ставени во функција. Според теренските забелешки и медиумските извештаи, градежни активности сѐ уште се видливи, што не остава впечаток дека отворањето ќе се случи во скоро време.
Дополнителна загриженост предизвикува и буџетското намалување за студентски стандард. Телма во ноември 2025 година објави дека буџетот за студентски стандард е намален за 7,3 милиони евра, додека Мета.мк пренесе дека во 2026 година државата ќе троши околу 30 отсто помалку средства за оваа намена во споредба со претходната година. Министерството за образование и наука, пак, тогаш тврдеше дека средствата се проектирани според реалните потреби и дека ќе овозможат непречено остварување на студентските права.
Но, сведоштвата од студентските домови зборуваат за поинаква реалност. Топла вода, функционални лифтови, хигиенски услови без глодари, навремени стипендии и јасна комуникација од институциите не се луксуз, туку основни предуслови за достоинствен студентски живот. Кога студентите се принудени сами да купуваат средства против глувци, да бараат туш кај пријатели и да чекаат пари што им следуваат, тогаш проблемот одамна ја надминал рамката на „технички дефект“.
ЦИВИЛ, во остро соопштение објавено денеска, ги осуди институциите одговорни за скандалозната состојба во студентските домови и за континуираното уривање на студентскиот стандард.
„Студентскиот стандард не е споредна ставка во буџетот, туку инвестиција во иднината на земјата. Во услови кога сѐ повеќе млади својата иднина ја планираат во странство, лошите услови во студентските домови испраќаат опасна порака: дека државата не успева да им обезбеди ни минимум достоинство на оние од кои утре очекува знаење, работа и развој“, се вели во соопштението.
Б. Јордановска
