Американските власти објавија дека мировниот договор со Иран е „во голема мера испреговаран“. Договорот би можел да стави крај на конфликтот што ескалираше во февруари, но клучните детали сè уште предизвикуваат спротивставени реакции од двете страни.
Според предложениот нацрт-меморандум, се очекува продолжување на прекинот на огнот за 60 дена, деблокада на ирански средства во вредност од околу 20 милијарди долари (кои главно се наоѓаат во Катар) и почеток на нови преговори за ограничување на иранската нуклеарна програма.
Една од најкритичните точки во преговорите останува контролата врз Ормускиот теснец, стратешка артерија низ која поминува околу една петтина од светското снабдување со нафта.
Иако американските претставници тврдат дека договорот ќе гарантира целосно отворен теснец без патарини за меѓународниот бродски сообраќај, иранските медиуми објавија поинаква верзија. Според извори блиски до Исламската револуционерна гарда, контролата на рутите, управувањето со теснецот и издавањето дозволи за премин ќе останат исклучиво во рацете на Иран, што претставува сериозна точка на конфликт со Вашингтон.
Пакистанската дипломатија одигра клучна улога во посредувањето меѓу двете страни. Премиерот Шехбаз Шариф и началникот на армијата Асим Мунир најавија дека Пакистан е подготвен многу наскоро да биде домаќин на следната рунда преговори.
Сепак, безбедносната состојба во поширокиот регион останува крајно неизвесна. Истрагата за неодамнешниот напад со дронови врз нуклеарната централа Барака во Обединетите Арапски Емирати потврди дека беспилотните летала биле лансирани од ирачка територија, што укажува на вмешаност на регионални милиции.
Американската блокада на иранските пристаништа останува во сила. Администрацијата на Трамп инсистира дека притисокот нема да се намали сè додека договорот не биде дефинитивно ратификуван и потпишан.
Б. Ј.
