Работата на Собранието во 2016 година во делот на аспирациите за членство во Европската унија се сведува на усвојување на повеќе „европски закони“, заобиколувајќи ја целата процедура, предвидена за законите со европско знаменце во периодот 2014-2016.
Ова е заклучокот од годишниот извештај за работата на Собранието, „Ефективен собраниски надзор? Отсликување на реалноста во процесот на правна хармонизација со ЕУ“, подготвен од Институт за демократија „Социетас Цивилис“- Скопје (ИДСЦС).
„Собранието донесе вкупно 14 закони кои произлегуваат од Национална програма за усвојување на правото на Европската унија и претставуваат усогласување со правото на ЕУ. Притоа, симптоматично е што 13 закони воопшто не се разгледувани на седница на Комисијата за европски прашања, за истите нема европско знаменце, нема изјава за усогласеност, ниту кореспондентна табела, иако се прикажани како ‘европски’ закони“, се вели во извештајот.
„Загрижувачки е податокот дека Комисијата за европски прашања се заобиколува и притоа, се оневозможува да ја извршува својата примарна, надзорна и контролна функција, имено, следење на процесот на усогласување на националното со законодавството на ЕУ. Ниедна од политичките партии присутни во Собранието, не ја забележала оваа пракса и соодветно не интервенирала со препорака – истата да се напушти во интерес на процесот на интеграција во Унијата“, велат од ИДСЦС.
„Проверка на усогласеноста на предлог законскиот акт со правото на ЕУ од страна на Комисијата за европски прашања во финалната законодавна фаза. Постоечката пракса – разгледување на предлог законскиот акт со кое се врши усогласување само во прво читање, треба да се унапреди и истата да се надополни со учество на Комисијата за европски прашања, до конечното усвојување на законското решение кое произлегува од Национална програма за усвојување на правото на Европската унија и со кое се врши усогласување. Комисијата е таа која треба да е последниот арбитер за оценка на усогласеноста пред законскиот акт финално да се гласа на пленарна седница“, се дел од препораките сместени во извештајот, со цел враќање на вистинската улога на Собранието и ефикасно извршување на контролна и надзорна функција, а со цел унапредување на процесот на правна хармонизација.
Публикацијата е изработена во рамки на проектот „Улогата на Собранието во процесот на пристапување кон ЕУ„ имплементиран во рамки на проектот „ИПА2 Механизам на граѓанските организации“, спроведен од организациите „Евротинк“, „Еко-свест“, „Реактор“ и „Зенит“.
