Измените на Изборниот законик остануваат заглавени и блокирани во Собранието. Власта и опозицијата повторно не успеаја да постигнат договор за клучните решенија. Наместо консензус за реформа на изборните правила, се продолжи со меѓусебни обвинувања за политички манипулации, злоупотреба на европската агенда и обиди за обезбедување предност пред следниот изборен циклус.
Владата тврди дека усогласувањето на изборното законодавство е дел од реформските обврски на државата и дека неговото одложување може да влијае врз реализацијата на дел од реформската агенда и користењето на европските средства поврзани со неа. Според владејачката ВМРО-ДПМНЕ, опозицијата преку блокади и илјадници амандмани го попречува процесот и создава политичка криза.
Од друга страна, СДСМ ги отфрла овие тврдења, оценувајќи дека власта свесно ја поврзува европската перспектива со сопствените предлози за измена на Изборниот законик. Според опозициската партија, ЕУ не бара усвојување на конкретниот модел што го предлага Владата, туку инсистира на фер и транспарентни избори, владеење на правото, независно судство и борба против корупцијата. Од СДСМ сметаат дека предложените решенија, особено оние што се однесуваат на гласањето на дијаспората преку пошта или електронски, отвораат простор за можни злоупотреби и затоа не смеат да се носат без широк политички и општествен консензус.
Прашањето за гласањето на дијаспората останува најголемата точка на судир меѓу политичките партии. Власта предлага нови модели кои, според неа, ќе овозможат поголема вклученост на македонските државјани во странство, додека опозицијата предупредува дека ваквите решенија немаат доволно гаранции за безбедност и контрола на изборниот процес. Паралелно, Левица повторно инсистира на воведување една изборна единица и отворени листи, оценувајќи дека токму тие претставуваат суштински демократски реформи, а не промените што моментално ги предлага Владата.
Во расправата често партиите се повикуваат и препораките на ОБСЕ/ОДИХР, но и тука постојат различни толкувања. Опозицијата бара нивна целосна имплементација, вклучително и поголема транспарентност и подобрен пристап до изборниот материјал, додека власта тврди дека токму предложените измени се чекор кон усогласување со меѓународните стандарди.
Во Собранието се поднесени повеќе од 13.000 амандмани, што практично го блокира законодавниот процес и ја прави неизвесна можноста за брзо усвојување на измените. Наместо расправа за пошироки изборни реформи – како една изборна единица, отворени листи, подобрување на избирачкиот список или целосна имплементација на препораките на ОБСЕ/ОДИХР – политичката дебата останува фокусирана на меѓусебните обвинувања и на прашањето кој ја сноси одговорноста за застојот.
ЦИВИЛ Медиа Деск
Во ера на дезинформации, националистички популизам и авторитаризам, неопходна е вашата поддршка за ЦИВИЛ.
Поддржете ги независните медиумски платформи на ЦИВИЛ во борбата против дезинформациите, национализмот, хибридните закани и авторитаризмот
Дајте го својот придонес СЕГА.
