Европската Унија останува целосно посветена на европската перспектива на Северна Македонија, но напредокот кон членството ќе зависи од спроведувањето на суштинските реформи, особено во областа на владеењето на правото. Ова беше главната порака што евроамбасадорот Михалис Рокас ја упати на седницата на Националниот совет за евроинтеграции, одржана во Собранието на 22 јули.
„Не треба да имате никакво сомневање дека Европската комисија е целосно посветена да ја види вашата земја како полноправна членка на Европската Унија“, изјави Рокас.
Тој оцени дека Северна Македонија покажала институционален капацитет за спроведување на реформите, но нагласи дека тие мора да дадат конкретни резултати. Посебно ја истакна потребата од независно и ефикасно судство, ослободено од политички влијанија, со доволно кадровски и финансиски ресурси, како и итно пополнување на испразнетите судски позиции. Рокас нагласи дека е неопходен широк политички консензус за клучните закони, меѓу кои и Изборниот законик, како и дека позитивниот извештај од Европската комисија ќе зависи пред сè од напредокот во владеењето на правото.
Проширувањето добива нова динамика
Рокас посочи дека процесот на проширување на Европската Унија повторно добива силен политички импулс, наведувајќи ги неодамнешните меѓувладини конференции со Албанија, Црна Гора, Украина и Молдавија како доказ дека земјите кандидати кои ги исполнуваат условите напредуваат.
Тој се осврна и на француско-германската иницијатива за постепено интегрирање на земјите кандидати во единствениот европски пазар уште пред полноправното членство, паралелно со исполнувањето на реформските обврски.
Остра политичка расправа
Седницата беше обележана и со жестоки политички препукувања меѓу власта и опозицијата.
Претседателот на Националниот совет за евроинтеграции, Венко Филипче, ја обвини Владата дека свесно го забавува европскиот пат на државата, поставувајќи прашање дали актуелниот застој претставува „форма на државен удар врз европската иднина“.
Од друга страна, претседателот на Комисијата за европски прашања, Антонио Милошоски, одговори дека причините за блокадата лежат во политиките на претходната власт и преземените билатерални обврски кон Бугарија.
Првиот заменик-претседател на Владата и министер за европски прашања, Беким Сали, повика реформската агенда да не биде жртва на дневнополитичките конфронтации и ги повика сите парламентарни партии да обезбедат поддршка за законите поврзани со европските реформи.
Нов модел на европско финансирање
Осврнувајќи се на европската финансиска поддршка, Рокас најави постепен премин од традиционалните ИПА-фондови кон нови, пофлексибилни инструменти во рамките на идната повеќегодишна финансиска рамка на ЕУ. Според него, новите механизми ќе овозможат поголема поддршка за реформите и постепена економска интеграција на земјите кандидати во единствениот европски пазар.
Б. Ј.
