Со оддавање почит кон загинатите и едноминутен молк, денеска во 11 часот во салата „Борис Трајковски“ во Собранието на Република Северна Македонија започна посебната сесија на Интерпартиската парламентарна група за поддршка на Кримската платформа, посветена на одбележувањето на 35-годишнината од независноста на Украина.
Сесијата ја отвори потпретседателот на Собранието, Антонијо Милошоски, по што се обрати амбасадорката на Украина во Северна Македонија, Лариса Дир. На сесијата обраќање ќе има и претставникот на Интерпартиската парламентарна група за поддршка на Кримската платформа, Оливер Спасовски.
Во рамки на одбележувањето свои обраќања ќе имаат и амбасадорите на Франција, Кристоф Ле Риголер, на Германија, Петра Дрекслер, и в.д. амбасадорот на Полска, Мариуш Бримора.
По сесијата во „Борис Трајковски“, програмата продолжува во Кристалната сала, каде што ќе бидат претставени изложбата „Враќање на сеќавањето на Херсон“ и изложбата посветена на светското наследство на Украина под заштита на УНЕСКО.
Предвидена е и презентација на македонскиот превод на романот на Васил Шкљар „Црниот гавран: останатиот“.
Одбележувањето на 35-годишнината од независноста на Украина во Собранието се одржува во знак на солидарност и поддршка за украинскиот народ, како и во контекст на меѓународните напори за заштита на територијалниот интегритет и суверенитет на Украина.
35 години независна Украина
На 24 август 1991 година, во услови на распаѓање на Советскиот Сојуз, Врховната рада го усвои Актот за прогласување независност на Украина. Со овој документ, Украина беше прогласена за независна демократска држава, а нејзината територија за неделива и неповредлива. Одлуката доби убедлива демократска потврда само неколку месеци подоцна. На референдумот од 1 декември 1991 година гласаа повеќе од 31,8 милиони граѓани, односно 84,18 проценти од избирачите. Од нив, 90,32 проценти гласаа за независна Украина. Поддршката за независноста беше мнозинска во сите 27 тогашни административни единици, вклучително и Крим, Донецк и Луганск област.
Б. Ј.
Прочитајте повеќе:
35 години независна Украина: Од референдумот во 1991 до борбата за слобода денес
35 години независна Украина – историја што се создава секој ден
