МЕДИУМСКА ОПСЕРВАТОРИЈА | ЦИВИЛ
На денешната посебна сесија на Интерпартиската парламентарна група за поддршка на Кримската платформа, посветена на одбележувањето на 35-годишнината од независноста на Украина, беше забележливо отсуството на пратениците Албанци.
Во дел од медиумите тоа се протолкува како бојкот поради неодамнешната изјава на украинскиот претседател Володимир Зеленски во Белград, каде што тој потврди дека позицијата на Украина за непризнавање на Косово останува непроменета.
На сесијата не присуствуваше ни претседателот на Собранието, Африм Гаши, на чија иницијатива е формирана Интерпарламентарната група во 2024 година.
Отсуството, сепак, не беше забележливо само кај пратениците Албанци. На сесијата не присуствуваа ниту претседателката Гордана Сиљановска-Давкова, премиерот Христијан Мицкоски, ниту други високи претставници на Владата. Од извршната власт присуствуваше заменик-министерот за надворешни работи и надворешна трговија Зоран Димитровски. Овој дел од сликата остана во сенка на медиумските наслови во кои отсуството на пратениците Албанци беше ставено во преден план и протолкувано како бојкот.
ЦИВИЛ МЕДИА побара одговор од претседателот на Собранието „на што се должи денешното отсуство на пратеници Албанци на настанот во Собранието по повод 35 години независна Украина?“
„Сите пратеници добија покана за настанот, без разлика на етничката и партиската припадност. Кој присуствувал, а коj не, не се должи на етничката припадност, според мене. Сѐ додека ниту една од парламентарните групи не се изјасниле зошто би учествувале или не, мислам дека секој пратеник самостојно одлучил дали ќе присуствува на настанот“, изјави Гаши за ЦИВИЛ МЕДИА.
На прашањето зошто тој самиот не учествуваше на сесијата, Гаши одговори:
„Денеска не бев во Скопје.“
Според дел од медиумите, од партијата ДУИ одговориле дека дел од пратениците се отсутни поради годишните одмори, а дел не биле информирани.
Сепак, ваквото толкување во дел од медиумите се надоврзува и на изјавата на пратеникот Ријад Шаќири од Алијансата за Албанците, партија што е дел од владејачката коалиција. Шаќири, цитиран во „Слободен печат“, изјави:
„Во истиот момент кога украинскиот претседател Зеленски се изјасни дека Косово е во составот на Србија, не може да ја има нашата поддршка. Во знак на протест решив да не дојдам на сесијата за независноста на Украина во Собранието, ниту, пак, во иднина ќе учествувам на каква било манифестација и одбележување во врска со Украина.“
Изјавата на Шаќири потврдува еден конкретен случај на свесен политички протест поради позицијата на Украина кон Косово. За останатите отсутни пратеници, од достапните информации не може да се заклучи дека станувало збор за организиран или координиран бојкот.
Отсуствата на сесијата несомнено отвораат политички прашања, а реакциите по изјавата на Зеленски во Белград се важен дел од контекстот. Но, мотивите за отсуствата не се исти, ниту се утврдени за сите што не присуствуваа.
Притоа, забележливо беше и отсуството на високи претставници на Владата, вклучително и на премиерот, како и на претседателката на државата. Нивното неприсуство, сепак, не беше ставено во истиот медиумски контекст на бојкот. Оттаму, достапните факти не даваат доволно основа отсуството на пратениците Албанци да се квалификува како колективен, координиран бојкот.
Неопходна е вашата поддршка за ЦИВИЛ.
Поддржете ги независните медиумски платформи на ЦИВИЛ во борбата против дезинформациите, национализмот, хибридните закани и авторитаризмот
Дајте го својот придонес СЕГА.
