Косово останува на страната на Украина во нејзината борба против руската агресија и покрај несогласувањето со официјален Кијив околу непризнавањето на независноста на Косово, порача денеска вршителот на должноста премиер на Косово, Албин Курти.
На приемот организиран од Претседателството на Косово по повод 35-годишнината од независноста на Украина, Курти изјави дека позицијата на Косово кон Украина е иста од почетокот на руската агресија и нагласи дека косовската солидарност со Украина „никогаш не била трансакциска“.
Истовремено, Курти отворено ја оспори украинската политика кон Косово.
„Свесни сме дека Кијив сè уште не ја признава независноста на Република Косово и дека оваа позиција беше повторена пред две недели. Ние веруваме дека таа позиција не стои ниту пред историските факти, ниту пред меѓународното право и ќе го кажуваме тоа секогаш кога ќе биде потребно“, изјави Курти, додавајќи дека Косово би го поздравило признавањето од Украина.
Изјавата доаѓа две недели по посетата на украинскиот претседател Володимир Зеленски на Белград, каде што, одговарајќи на новинарско прашање за Косово, потврди дека украинската позиција за непризнавање останува непроменета. Изјавата предизвика разочарување и политички реакции во Косово и пошироко во регионот, како и дебата во самата Украина, а воедно даде дополнителен простор за наративите што ги пласираат и засилуваат белградските и московските пропагандни кујни.
Пораката на Курти, сепак, прави јасна разлика меѓу несогласувањето со политиката на Кијив кон Косово и поддршката за Украина во нејзината одбрана од рускиот агресор. Косово ја оспорува украинската позиција за признавањето, но не ја условува својата солидарност со промена на таа позиција.
Оваа порака добива дополнително значење и во контекст на денешните реакции во Северна Македонија, каде што отсуството на пратеници Албанци од сесијата во Собранието посветена на независноста на Украина во дел од медиумите беше протолкувано како бојкот поради ставот на Зеленски за Косово. Еден пратеник, Ријад Шаќири, јавно потврди дека неговото отсуство било политички протест, но засега нема потврда дека станувало збор за координиран бојкот на пратениците Албанци.
Пораката од Приштина останува непроменета. Косово не се согласува со политиката на Кијив за непризнавање, но тоа воопшто не ја доведува во прашање косовската поддршка за Украина во борбата за слобода. Денешната изјава на Курти е само уште една потврда за таа позиција.
ЦМ Деск
Дипломатијата, пропагандата и цената на лажните еквиваленции: Кијив – Белград – Приштина – Москва
