ПР содржина
Случајот „Мазут“ повторно се враќа во фокусот, откако Вишото јавно обвинителство Скопје донесе одлука истрагата да продолжи. Одлуката следува и покрај тоа што ОЈО ГОКК во мај ја запре постапката со образложение дека не биле обезбедени докази за сторени кривични дела и дека не била утврдена штета за ЕСМ или државниот буџет.
Универзитетскиот професор Гордан Калајџиев во изјава за Канал 5 Телевизија ја доведе во прашање ваквата одлука и оцени дека Вишото обвинителство се става во позиција слична на судска инстанција.
„Мене ми изгледа ова дека е практично политички инспирирано. Во дадената ситуација практично нема можност за ревизија на јавнообвинителската одлука што беше донесена. Одлуките што ги донесува Обвинителството се независни, по кои инстанции и кој обвинител ги има донесено, бидејќи внатрешната функционална надлежност е прилично слободна, би рекол, во Обвинителството и не може да глуми повисокиот обвинител некаков сега суд, којшто наоѓа слабости во вештачењето на понискиот, односно надлежниот обвинител што постапува по случајот и да го враќа случајот сега на штета на осомничениот во постапката. Тоа е спротивно на процесни принципи, на идејата за правна сигурност, на пресумпција на невиност“ – истакна професорот Калајџиев.
Вишото обвинителство, пак, образложи дека се констатирани слабости во вештачењата врз кои била донесена одлуката за запирање на истрагата. Затоа ОЈО ГОКК доби насоки да прибере дополнителни податоци од повеќе институции и да нареди нови вештачења.
Во предметот се опфатени 13 физички и едно правно лице, а истрагата се однесува на набавките на мазут за ТЕЦ „Неготино“.
Клучниот факт од претходната постапка е дека не беше утврдена штета од 167 милиони евра, колку што било наведено во пријавата на МВР. ОЈО ГОКК оцени дека мазутот бил испорачуван навремено и континуирано и дека не била утврдена штета за ЕСМ или државниот буџет.
Во истрагата не беше потврдено ниту дека мазутот предизвикал загадување на воздухот. Според официјалните извештаи на ТЕЦ „Неготино“, во периодот опфатен со истрагата не било регистрирано загадување од централата, а не било утврдено ниту надминување на граничните вредности за квалитетот на мазутот.
Паралелно со тоа, ТЕЦ „Неготино“ во 2022 година остварила добивка од приближно 2,25 милијарди денари или околу 36,5 милиони евра.
Анализите на ФЕИТ покажуваат дека доколку струјата во периодот на енергетската криза се обезбедувала преку увоз, трошокот би достигнал околу 880 милиони евра.
Сега истрагата продолжува. Но, со оглед на тоа што претходно не беа утврдени ниту штета ниту загадување, останува прашањето дали новото постапување ќе донесе нови докази или ќе се преиспитуваат заклучоци кои веќе биле донесени во истрагата.
PR & PUBLIC AFFAIRS | Во оваа рубрика се објавуваат промотивни, спонзорирани, партнерски и институционални содржини. Текстовите се јасно означени (ПР содржина) и не претставуваат редакциски став на ЦИВИЛ МЕДИА.
