„Талир“, „Траекторија“ и „Тревник“ се трите нови истраги што Специјалното Јавно обвинителство ги објави денеска, кои произлегуваат од незаконско прислушуваните разговори. СЈО уште денеска ќе побара замрзнување на дел од имотот на ВМРО-ДПМНЕ, поради незаконско финансирање на партијата! Експремиерот е првоосомничен во случајот за незаконско финансирање на ВМРО-ДПМНЕ, како и за нанесена штета на буџетот од 155 милиони евра, во случајот со тендерот за изградба на автопатиштата Миладиновци-Штип и Кичево-Охрид што го доби кинеска фирма!
Првата истрага „Талир“ се однесува на перење на пари, односно на незаконско финансирање на ВМРО-ДПМНЕ, при што постои основано сомнение дека во периодот од 2009 до 2015 година, се злоупотребени 4,9 милиони евра! Биле склучени 71 договор за купување недвижен имот, платен од овие незаконски стекнати пари. Дел од имотот не бил во функција на остварување на целите на партијата и не се користи за партиски цели, без партиски обележја.
Како што потенцираше обвинителката Фатиме Фетаи, високи функционери од партијата, претставувајќи во јавноста дека работат во интерес на партијата, ја злоупотребиле за свои лични интереси. Се работи за претседателот на партијата (Никола Груевски), генералните секретари од тој период (Емил Димитриев, Мартин Протуѓер и Кирил Божиновски), шефовите на центарот за комуникации и сите овластени да ја потпишуваат сметката на партијата. Осомничени се вкупно 11 лица.
Презентирајќи ги деталите за оваа истрага, обвинителката Ленче Ристоска рече дека уплатниците се пополнувани со ист ракопис и се уплаќани во временски интервали од 20 до 30 секунди.
Високи функционери на партијата се осомничени и за злоупотреба на службената должност при изградба на главното седиште на партијата во Скопје, во соработка со градежната фирма “Бетон“. Несразмерноста во инвестицијата на ВМРО-ДПМНЕ и на „Бетон“ е прикажана како донација од градежната фирма, што партијата не смеела да ја прими, со оглед на тоа што градежната фирма извршува јавни работи. Во овој случај се осомничени пет лица.
Од СЈО известија дека засега нема да бидат побарани мерки за обезбедување на осомничените, односно притвор, но рекоа дека уште денеска ќе побараат замрзнување на дел од имотот на партијата, меѓу кои и на зградата во која е штабот на ВМРО-ДПМНЕ.
Во случајот „Траекторија“ првоосомниченото лице е исто со осомниченото лице од случајот „Талир“, односно како што потврди Ристеска, се работи за претседателот на опозиционата ВМРО-ДПМНЕ. Во овој предмет осомничени се четворица поранешни припадници во Владата кои во 2012 и 2013 година презеле незаконски дејствија за изградба на автопатиштата Миладиновци-Штип и Кичево-Охрид и со своите постапки (воопшто не разгледувајќи ја најповолната понуда за градба и не постапувајќи според правилата, при изборот на кинеската фирма и банката која ги дала парите за изградба на овие патишта) на Буџетот на Македонија му нанеле штета од 155 милиони евра!
Во случајот „Тревник“ осомничени се три лица за изградба на три викенд куќи во Зелениково без да имаат право за градба. Според доказите, овие три куќи почнале да се градат во 2011 година, а во 2013 година сопствениците добиле дозвола за градба иако тогаш објектите биле завршени. „Законот за градба предвидува обратен редослед“, истакна Фетаи.
На почетокот на прес-конференцијата, специјалната обвинителката Катица Јанева повторно побара новото парламентарно мнозинство да го укине, избрише или измени членот кој се однесува на рокот на поднесување нови обвининенија. Јанева информираше дека 55% од прислушуваните разговори што ги поседуваат, во моментот не се разгледуваат, затоа што работат на случаи отворени врз основа на веќе обработените податоци.
Марија Теговска
Фото: Дехран Муратов
