Американскиот економист, професор и поранешен секретар за труд Роберт Рајх, во најновиот текст објавен на неговиот Substack, го поврзува случајот со наводното групно силување на поранешна студентка на Универзитетот Корнел со пошироката политичка и културна атмосфера во САД и со она што тој го опишува како подем на мизогинијата и „маносферата“ во ерата на Доналд Трамп.
Случајот се однесува на тужба поднесена во септември од жена, идентификувана како „Jane Doe“, која тврди дека во 2024 година била дрогирана и сексуално нападната од седум членови на братството Chi Phi. Обвинетите негираат дел или сите наводи, а случајот сè уште нема судски епилог. Кривичната истрага, која првично била затворена без обвиненија, повторно беше отворена, а на 2 октомври гувернерката на Њујорк, Кети Хокул, ја назначи државната обвинителка Летиција Џејмс за специјален обвинител во случајот.
Рајх нагласува дека не знае што точно се случило во куќата на братството, но случајот го користи како повод за пошироко прашање: дали политичката култура може да создаде чувство на неказнивост кон насилството и понижувањето на жените.
„Живееме во време кога мажите… чувствуваат извесна неказнивост кога станува збор за напади врз жени“, пишува Рајх.
Во тој контекст тој го посочува однесувањето и реториката на претседателот Доналд Трамп, но и кругот околу него, вклучувајќи ги Џеј Ди Венс, Пит Хегсет и Илон Маск. Според Рајх, современата „маносфера“ е организирана околу идеите за „доминација и потчинување“, при што агресивната машкост се претставува како политичка и општествена вредност.
Како поткрепа за поширокиот тренд, Рајх се повикува на анализа на Institute for Strategic Dialogue, според која по изборите во 2024 година нагло се зголемиле мизогинистичките пораки на интернет. Фразата „your body, my choice“, на пример, забележала раст од околу 4.600 проценти на платформата X во првите 24 часа по изборниот резултат.
Рајх сепак прави важна ограда: не тврди дека машката доминација е единствената карактеристика на трампизмот, ниту дека мизогинијата е својствена само за авторитарните политички движења. Неговата теза е дека случајот Корнел треба да се разгледува и во пошироката култура во која моќта, агресијата и потчинувањето сè почесто се претставуваат како доблести.
Целиот текст на Роберт Рајх на Substack
ПОДДРШКА ЗА ЦИВИЛ. ДОНИРАЈТЕ ДЕНЕСКА.
Ако го цените тоа што го прави ЦИВИЛ, поддржете ја нашата работа.
Вашата поддршка ни овозможува да известуваме, да ја одржуваме платформата за демократски дијалог, да објавуваме едукативни содржини, да се бориме против лагите и да ги браниме човековите права и слободата.
Поддржете го ЦИВИЛ. Донирајте ДЕНЕСКА.
