„Со ‘феудално’ раководење, со притисоци, со закани и преместувања на професионалците, се убива истовремено и човекот и професионалецот во ЦУК, како основен ресурс во државата, а јавноста има право да знаеме како се раководи државен орган и како се трошат народните пари“, истакна Илија Бојаровски, претседател на Синдикатот на вработените во Центарот за управување со кризи на Владата.
Бојаровски потенцира дека заложбите на Синдикатот се да се престане со третман на Центарот како монета за партиско поткусурување и да се поставуваат професионалци, а не политичари, на раководни позиции. Тој бара да се врати избришаните услови од Законот за управување со кризи: дека за директор на ЦУК се бира лице кое најмалку 6 години работело во сферата на одбраната и безбедноста, односно на кризниот менаџмент, и со тоа да се изедначи, со Управата за безбедност и контраразузнавање (УБК) и Бирото за јавна безбедност (БЈБ) во МВР, како и што беше, до пред неколку години.
„Да престане сегашниот ‘феудализам’ на Владата во ЦУК, со ‘упатување’ да се разместуваат луѓе и да се ‘дисциплинираат’, со ‘административно загушување’ на професионални кадри, кои се независни, достоинствени, образовани (и магистри и доктори на науки), потврдени професионалнo и во доменот на кризниот менаџмент и на домашно и на меѓународно поле, и не ‘веднат глава’ пред кого било, и не се „покорни“. Да се почне со редовно унапредување на кадарот во ЦУК, според закон, и со потвредена професионалност, во повисоки звања, без партиски влијанија, што 12 години е речиси закочен процес за најмногу од кадарот: како кој дошол во ЦУК, така и останал, со исто звање…“, истакна Бојаровски.
Тој побара соработка и со невладиниот сектор и со меѓународната заедница.
Текст и камера: Дехран Муратов
