Како што пренесува новинската агенција МЕТА, „патот до Брисел води преку Охридскиот рамковен договор и Законот за јазиците, како едно од најсензитивните и најважните прашања од договорот“, вели вицепремиерот за европски прашања, Бујар Османи во интервју за „Телма“.
Османи изјави дека Законот за јазиците е со европско знаменце, што предвидува негово донесување во брза постапка, затоа што е дел од националната програма за усогласување со европското законодавство и очекува до крајот на овој месец да се најде на дневен ред во Собранието.
„По 16 години постигнавме меѓуетнички консензус преку партиите што ги претставуваат македонската и албанската заедница да најдеме начин да го усогласиме различното интепретирање на членот 5 од Уставот и последното отворено прашање од Рамковниот договор да го унапредиме“ – вели Османи.
Според Османи, за донесувањето на законот нема да се чека мислењето на Венецијанската комисија околу употребата на албанскиот јазик на униформите на полицијата и на војската и на банкнотите. Тој додава дека, доколку Комисијата оцени дека овие одредби се уставни тие ќе бидат додадени во законот, а доколку не, тие ќе бидат оставени настрана.
Османи соопшти дека очекува во наредните денови да има средба со претставници на опозициската ВМРО-ДПМНЕ, на која ќе ја побара нивна поддршка за законот.
„Овој закон е одлична можност ВМРО-ДПМНЕ да го ревидира ставот во однос на Албанците. Текстот на законот е разговаран со сите политички партии и сите се запознаени со него. Очекувам наредните денови да се сретнам со претставници од ВМРО-ДПМНЕ со цел да укажам дека одредени прашања кои што се стратешки важни за државата треба да се издигнат на натпартиско ниво и за нив да биде постигнат консензуз. Се надевам дека ќе има разбирање по однос на потребата за затворање на ова важно прашање“ – нагласува Османи.
извор: МЕТА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
