Германскиот весник Велт ам Зонтаг јавува дека бројот на полициски истраги за поврзаност со тероризам во земјата драматично се зголемил во текот на 2017 година, при што 900 истраги се во тек, а од нив 800 се однесуваат на осомничени исламистички групи. За споредба, во 2013 година германската полиција истражувала само 70-ина осомничени терористички групи и поединци, пренесе новинската агенција ДПА, јавува МИА.
Според извештајот на специјална ревизија порачана од германските безбедносни служби, било утврдено дека полицијата направила низа грешки во истрагата кон тунискиот исламист Анис Амри, кој уби 11 лица и рани 60-ина во нападот врз божиќен пазар во Берлин во декември 2016 година.
Извештајот покажува дека не сите истраги кои се водат се однесуваат на закана од нови терористички напади. Дел од случаите се отворени за сириски државјани, кои се бореле во редовите на Исламската Држава, а сега бараат азил во Германија.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
