Главните каталонски сепаратистички партии постигнаа договор да го реизберат Карлес Пуџдемон за претседател на автономната област Каталонија, кој истовремено ја извршува и премиерската функција.
Пуџдемон, кој ја предводеше каталонската регионална влада, беше сменет од функцијата од страна на централната власт во Мадрид по референдумот за независност на Каталонија, кој беше прогласен за незаконски од шпанското правосудство. Оттогаш Пуџдемон е во Брисел и доколку се врати дома, веднаш ќе биде уапсен за бунт и обид за одвојување на Каталонија од Шпанија.
На 21 декември во Каталонија се одржаа предвремени парламентарни избори, на кои најмногу гласови освои партијата „Граѓаните”, но сепаратистичките партии – „Заедно за Каталонија” на Пуџдемон и „Републиканска левица на Каталонија” на Ориол Жункерас, обезбедија кревко мнозинство во регионалниот парламент. Жункерас, поранешен заменик-премиер на Каталонија, се наоѓа во затвор во Шпанија под обвинение за бунт и сепаратизам.
Шпанските медиуми објавија дека минатиот вторник во Брисел, Пуџдемон се сретнал со генералниот секретар на „Републиканската левица на Каталонија“ Марта Ровира. Пуџдемон ја добил нејзината поддршка за негов реизбор во Каталонија.
Кандидатите за претседател на каталонската Влада, непосредно пред пратениците да гласаат за нив, одржуваат говор пред Парламентот. Портпарол на „Републиканската левица на Каталонија” изјави дека Пуџдемон ќе предложи пред каталонскиот парламент подоцна овој месец да се обрати по пат на видео-конференциска врска од Брисел. Друга опција е член на партијата на Пуџдемон да го прочита задолжителниот говор што премиерот мора да го одржи пред гласањето во парламентот.
Шпанскиот премиер Маријано Рахој кон крајот на минатиот месец, апелираше каталонскиот парламент да биде формиран до 17 јануари, што е прв чекор кон повторно формирање на локална влада во Каталонија.
По формирањето на парламентот, пратениците треба да предложат кандидат кој ќе ја предводи регионалната Влада. За него ќе треба да биде одржано гласање на доверба.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
Одговорноста за редакциското опремување на текстовите (наслов, наднаслов, фотографија, тагови) е на ЦИВИЛ Медиа.
