Бесим Иљази, новинар и директор на вестите на ТВ Арт од Тетово, зборува за слободата на изразување, медиумските слободи и за притисоците со кои се соочуваат новинарите денес.
ЦИВИЛ Медиа: Што за Вас претставуваат слободата на изразување и медиумските слободи?
Иљази: И двете категории зависат од општествените услови. Не можете да имате слобода на изразување или слободни медиуми без соодветни услови. Без слободно општество не може да имаме слободни медиуми. Двете категории се поврзани меѓусебно.
ЦИВИЛ Медиа: На кој начин Вие како новинар придонесувате или можете да придонесете во борбата за слобода на изразување и медиумски слободи?
Иљази: Ние немаме магично стапче. Како што реков, слободата на медиумите зависи од општествените услови во кои делуваме, како медиуми, како новинари и како општество на крајот на краиштата. Не може да имаме слободни медиуми без слободно општество кое нема предрасуди, општество кое е отворено со сите демократски капацитети кои ги имаат западните земји. Не случајно таму има и послободни медиуми и послободно општество и слобода на изразување.
ЦИВИЛ Медиа: Дали досега сте се соочиле со притисоци од политичките и бизнис центри на моќ и како се справувате со истите?
Иљази: Притисоци во класична смисла, како што имавме порано, на почетоците на 90тите или во претходниот систем, нема. Меѓутоа постои тој софистициран начин на притисок. Постои некаква софистицирана форма на вкусови на кои медиумите им подлегнуваат, без разлика дали се работи за политички или бизнис интереси. За жал.
ЦИВИЛ Медиа: Кои се вашите препораки во контекст на борбата за слободни медиуми?
Иљази: За жал ние по осамостојувањето само глумиме решенија за медиумската фела и носиме ад-хок решенија. Јас мислам дека треба систематски да му се пристапи на проблемот, преку јавни дебати, а не за нечии договори и интереси. Ние имаме парцијални закони кои не го решаваат проблемот на медиумите, новинарите и медиумските работници. За жал, овие решенија секогаш се носени во контекст на некои политички услови, а не за медиумите. Секогаш се носат решенија за други, или доволно не се консултираат новинарите преку јавни дебати за да се слушнат нивните проблеми. Да заклучам, треба систематски да му се пристапи на проблемот ако сакаме да имаме слободни и независни медиуми.
Маја Ивановска
Камера: Атанас Петровски
Овој проект е финансиран од Европската Унија преку програмата за мали грантови „Заштита на слободата на медиумите и слободата на изразување во Западен Балкан“ спроведена од Здружението на хрватските новинари, како дел од регионалниот проект „Регионална платформа на Западен Балкан за слобода на медиумите и безбедност на новинарите”, спроведена преку партнерство на шест регионални новинарски здруженија – Здружение на независни новинари на Србија, Здружение на новинари од Босна и Херцеговина, Здружение на новинари на Хрватска, Здружение на новинари на Косово, Здружение на новинари на Македонија и Синдикатот на медиуми на Црна Гора.
