Судијата Гонзало Куриел од Федералниот суд во Сан Диего синоќа го отфрли барањето за запирање на проектот на Администрацијата на САД за изградба на голем ѕид долж јужната граница кон Мексико.
Куриел во образложение на 101 страница, го отфрли барањето на група екологисти кои се противат на изградбата на ѕидот на границата кон Мексико, со образложение дека не постојат „сериозни уставни пречки“ во врска со планот на федералните власти. Во реакција на одлуката на Куриел, американскиот претседател Доналд Трамп оцени дека таа за него претставува „голема правна победа“.
– Сега овој важен проект може да продолжи, напиша Трамп на Твитер, додавајќи дека судијата застанал на страната на неговата Администрација.
Планот на американската Администрација предвидува изградба на ѕид на границата со Мексико, со кој би била заменета постоечката жичена ограда. Во текот на овој месец властите веќе започнаа со отстранување на речиси три километри од оградата во реонот на Калексико во сојузната држава Калифорнија, отворајќи простор за почеток на изградба на ѕидот.
Инаку, судијата Куриел стана попознат во американската јавност кога во текот на предизборната кампања во 2016 година, Трамп го критикуваше поради неговото мексиканско потекло.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
