Министерот за надворешни работи Никола Димитров денеска имаше проштална средба со шефот на Мисијата на ОБСЕ во Скопје, амбасадорката Нина Суомалаинен на која изрази задоволство од соработката со оваа Организацијата и посебно со Мисијата во земјава.
Како што соопшти МНР, Димитров искажа благодарност за активностите на Мисијата, како и значајната улога и ангажманот на амбасадорката Суомалаинен во изминатиот тригодишен период.
– Министерот Димитров ја повтори подготвеноста на Македонија да продолжи со ваквата соработка во наредниот период, особено во областите кои се комплементарни на европскиот и евро – атланскиот интегративен процес на земјата, стои во соопштението.
Шефот на Мисијата на ОБСЕ, од своја страна, се заблагодари на поддршката и отворената соработка со сите македонски институции за време на нејзиниот мандат, во, како што се наведува, исклучително значајни моменти за Македонија.
извор: МИА
