Сашо Орданоски, политички аналитичар и член на Експертскиот борд на ЦИВИЛ, учествуваше во панел дискусија што ЦИВИЛ ја организираше веднаш по завршување на референдумот.
Орданоски во контекст на придобивките и последиците од референдумскиот процес обрна внимание кон она што не очекува во блиска иднина на општествено-политички план, а како резултат од очекувања и добиените резултати од излезноста и гласањето на референдумот.
„Во Македонија политиката е zero -sum game, што во политичката и економската теорија или некој мора 100% да победи или 100% да изгуби. Вие во таква ситуација по ваков вид на големи општествени проекти како што е референдумот се соочувате со една реалност каде едните слават победа, а другите пораз, а во суштина се работи за една високо истакната волја на голем дел од населението, која потоа политичките реторики ги толкуваат потполно различно“, изјави Орданоски.
Анализирајќи ги говорите на Зоран Заев и Христијан Мицкоски, Орданоски смета дека она што не чека е најверојатно вонредни парламентарни избори.
„Се плашам дека повторно влегуваме во нешто што добро го знаеме последните 30 години, а тоа е нова политичка криза… немам оптимистичка прогноза иако јас мислам дека оваа цифра на луѓе што излегоа да гласаат, мислам дека е тоа една сериозна основа за политички процес што опозицијата го отфрла, барем според првичните најави…“, истакна Орданоски.
Според него, од тука натаму сè се сведува на интерпретации кои не познаваат средина за да нештата имаат доволно цврста основа врз која ќе се одвива политичкиот процес.
Орданоски смета дека заложбата граѓаните да бидат доволно информирани за што гласаат е остварена. Како што рече, нема дилеми дека независно дали излегле да гласаат „за“, „против“ или решиле да бојкотираат знаеле за што е референдумот.
„На крајот на краиштата секако дека се повредени правата на стотици луѓе, секако дека веднаш ќе се согласиме дека македонските институции не се перфектни, но македонските институции сме ние и тоа општиот квалитет на политичката култура, институционалната свест… овој референдум и во оваа смисла беше успешен. Луѓето имаа доволно информации и тој што сакал да подлегне на манипулации, тој секогаш подлегнува на истите… Ние сепак спроведовме референдум во една демократска сцена, со слободни медиуми, првпат имаме премиер кој не излезе да каже дека оние што нема да излезат да гласаат од администрација, следниот ден ќе бидат отпуштени… “, смета Орданоски.
Орданоски, на крајот заклучи на крајот ние првин ќе станеме правна држава, пред да станеме членки на НАТО и ЕУ.
Биљана Јордановска
Камера: Атанас Петровски
Монтажа: Бунјамин Камбери
