Во екот на случувањата во Собранието каде вчера започна дебатата за Предлог промени во Уставот на Република Македонија, со Павле Богоевски, независен пратеник, освен за вчерашната изјава на премиерот Зоран Заев, разговаравме и за очекувањата од дебатата и гласањето коешто следи.
„Ситуацијата во Собранието до самото гласање ќе биде многу неизвесна. За мене е голем успех што опозицијата присуствува на самата седница на која се расправа по предлогот на Владата и фактот дека се јавија за збор. Кога знаат дека нешто не може да помине едноставно не учествуваат во тоа за работата да се заврши побргу. Ова ми дава за право да верувам дека дури ниту партиското раководство на ВМРО-ДПМНЕ нема таква челична контрола врз сите свои пратеници како што се обидуваат да се претстават во јавноста“, изјави Богоевски.
Со оглед на вчерашната изјава на Илија Димовски дека опозицијата не отстапува од ставот дека треба да послуша гласот на народот, што подразбира дека народот одлучил да не излезе на референдум, го прашавме Богоевски дали тоа подразбира дека ќе нема двотретинско мнозинство.
„Проблематична ми е изјавата во која Илија Димовски или на целото ВМРО-ДПМНЕ или опозиција без разлика дали е парламентарна или не, си ги припишуваат на своето конто сите неизлезени гласачи. Во демократијата тоа не функционира. Ставот за или против за одреден документ во случајот Договорот од Преспа се мери на самиот референдум. Односно, можеме да кажеме дека против се оние што излегле и гласале против. Не можеме да кажеме дека сите тие што не излегле или останале дома или што се иселени од државата и сè уште имаат право на глас, дека сите се против. Но колку гласови беа „за“, а колку „против“, беше една успешна консултација за тоа каде граѓаните сакаат да се движи нивната држава“, рече Богоевски.
Богевски се огради од коментирање на прашањето за притисоците врз пратениците на ВМРО-ДПМНЕ како да гласаат и како ќе влијае на понатамошниот развој на состојбата во Собранието.
„До мене стигнаа информации дека дел од пратениците на опозицијата се под притисок да гласаат на еден или друг начин. Тие информации што стигнаа до мене се непроверени што значи дека не можам да ги презентирам како вистинити. Но, сакам да верувам дека поединечни колеги од опозицијата доколку се најдат под притисок или почувствуваат дека безбедноста им е загрозена дека истото тоа ќе го искоментира со Министерството за внатрешни работи. Верувам дека како што обезбеди МВР безбедност за нас кога се гласаше за законот за јазиците и во случајот со опозицијата ќе обезбеди безбедност“, изјави Богоевски.
„Секогаш кога ќе се отвори некое прашање кое е надвор од изборна програма, ако јас имам несогласувања со начинот на кој се решава тоа прашање го комуницирам внатре во коалицијата. Доколку тоа несогласување биде толку големо и не може да се реши внатре во коалицијата со кое не се согласувам, верувам дека тоа прашање ќе го изнесам и надвор во јавноста, ќе побарам поддршка. Факт е дека ќе ме поистоветуваат, тоа се очекуваше уште на самиот почеток, но јас верувам дека моите постапки дали сум се приклонил или не, но да не повторувам јас сум дел од коалицијата. Не може политички ставови да се изедначуваат и да бидат презентирани кон целосно приклонување кон одредена политичка партија. Да јас, коалицијата и СДСМ ги делиме истите политички вредности, ама во тоа и како имаме несогласувања за поединечни прашања за тоа како да се реализираат тие вредности“, беше објаснувањето на Павле Богоевски за неговото поистоветување со каузата на СДСМ.
За крај со Павле Богоевски зборувавме за тоа колку граѓанските активисти се снајдоа во новата улога на пратеници и советници во составот на новата Влада.
„Не ми беше лесно и сè уште не ми е лесно. Дури не ми е лесно целосно во овој момент да ја владеам новата улога од проста причина што да се биде пратеник или советник е занает сам по себе… Верувам дека најголем дел од тие што одлучија институционално да ја продолжат борбата останаа со чисто срце и посветени на каузата“, рече Богоевски.
Биљана Јордановска
Камера: Атанас Петровски
