„Најважното нешто што ја одбележа 2018 година е отсутвото на организирано насилство кон организациите и кон бранителите на човековите права на ЛГБТИ луѓето. Отсутвото на тој вид на насилство, од една страна, го потврдува влијанието на говорот на омраза и хомофобичните и трансфобичните кампањи што претходната гарнитура на власт ги ширеше преку мејнстрим медиумите. Од друга страна, ги вади на површина другите проблеми, односно насилството што беше прикриено, пред сè домашното насилство“, изјави Кочо Андоновски, програмски директор на ЛГБТИ Центарот за поддршка во разговор со ЦИВИЛ Медиа за Перспективи 2019.
Андоновски истакна дека жртви на домашно насилство се сè помлади ЛГБТИ припадници, а тоа го потврдува и функционирањето на Сигурната куќа каде над 50% од корисниците се помлади од 30 години. Тој истакна дека за година ипол колку што функционира шелтерот, има 20 корисници што е голема бројка ако се има предвид вкупниот број на население во државата.
„Морам да забележам дека оваа политичка волја која ја гледаме кај лидерството и во партиите, меѓутоа и во структурите на власта, сè уште не се рефлектира доволно надолу низ структурите на институциите“, изјави Андоновски посочувајќи и на одличната соработка со Министерството за труд и социјална политика и заложбите на министерката Мила Царовска, како и соработката со Министерството за внатрешни работи.
„Од аспект на правниот статус на ЛГБТИ заедницата промените што се случија се многу мали. Имаше промена во Кривичниот законик, односно сексуалната ориентација и родовиот идентитет влегоа во делот на дела од омраза, каде што се еден од забранетите основи што можат да сносат поголема казна. Сексуалната ориентација и родовиот идентитет влегоа во законот на АВМУ. Во делот на говор на омраза тие се експлицитно забранети. За жал, новиот Закон за спречување и заштита од дискриминација сè уште не е донесен и е заглавен во собраниска процедура. Ова многу лошо зборува за нашата држава и третманот што го има кон маргинализираните заедници“, рече Андоновски сметајќи дека блокадата во Собранието од пратениците на ВМРО – ДПМНЕ и ДУИ поради тоа што би им биле повредени релегиозните чувства е скандалозна, неоправдана и неодржлива.
Андоновски смета дека формирањето на ЛГБТИ меѓупартиската група во Собранието е многу важна за застапување на барањата и потребите на ЛГБТИ заедницата пред пратениците.
„Мислам дека оној грејс период што го дадовме на Владата поради Преспанскиот договор веќе измина. Сега веќе ќе нема изговор за да не се постигне многу повеќе во однос на еднаквоста и тоа не само за ЛГБТИ луѓето. Очекувањата за 2019 година се повисоки кај граѓанскиот сектор. Мислам дека ако го почнеме процесот за преговори со ЕУ ќе се создаде простор за едно посериозно преосмислување и преуредување на нашето општество. Она што останува како главна цел е зајакнување на заедницата надвор од главниот град. Скопје е поголем град и има повеќе простор ЛГБТИ луѓето да се снајдат, да не се почувствуваат осамени, да имаат некој со кого можат да споделуваат… Надвор од Скопје навистина е многу потешка ситуацијата… Остануваме псоветени на зајакнување на локалните јадра преку кои дејствуваме, но и да ја започнеме и развиеме соработката на овие јадра со општините, односно локалните власти“, рече Андоновски за очекувањата во 2019 година.
Биљана Јордановска (разговор, текст и фотографија)
Камера и монтажа: Ариан Мехмети
