СЈО станува дел од ОЈО
Владата на денешната седница го усвои Законот за Јавното обвинителство во кој е регулиран статусот, автономијата и надлежностите на СЈО. Со новото законско решение, тоа ќе стане дел од системот на јавното обвинителство.
„Бомбите“, односно материјалите од нелегално прислушуваните разговори СЈО нема да може да ги користи како доказ во предметите „Талир“ и „Империја“, односно во сите случаи кои ги покренале по 30 јуни 2017 година. Исто така, СЈО ќе има рок до септември 2020 година да ги слуша бомбите и дотогаш да ги искористи како индиции за сторени кривични дела, но не и како докази. Овој Закон помина на Влада, а во наредните денови се очекува да го помине и собранискиот филтер.
На повидок ново министерство
На 14 март пред пратениците во Собранието ќе се најде предлогот за формирање ново министерство кое ќе биде за политички систем и односи меѓу заедниците. Тоа, всушност, ќе биде Секретаријатот за спроведување на рамковниот договор за кој група пратеници предлагаат да прерасне во министерство.
Со личноста што ќе застане на чело на тој ресор, бројот на министри и вицепремиери во Владата на Зоран Заев најверојатно ќе остане непроменет, односно 25, бидејќи извесно ќе биде укинувањето на функцијата вицепремиер задолжен за спроведување на Рамковниот договор и политички систем на која во моментов се наоѓа Хазби Лика.
Дури и да не се формира новото министерство, Република Северна Македонија ќе биде меѓу водечките европски земји по бројност на владиниот состав, наспроти тоа што СДСМ, додека беше во опозиција, ветуваше дека ќе го намали министерските позиции.
Претседателски избори 2019 со тројца кандидати
Сѐ поизвесно е дека на претстојните претседателски избори ќе се бира меѓу тројца кадидати, а останатите петмина кои собираат потписи речиси и немаат шанси да ја официјализираат кандидатурата до сабота (9 март), кога истекува и рокот за давање на граѓанска поддршка за претендентите на претседателската функција во државата.
Прва се кандидира и собра потписи за поддршка, професорката Гордана Силјановска Давкова. По неа следеше професорот по меѓународно право, Блерим Река, поддржан од Алијансата на Албанците и БЕСА. Третиот познат кандидат е професорот Стево Пендаровски кој ја доби поддршката од 31 политичка партија на сите етнички заедници во земјата. Тој, најверојатно, ќе се кандидира за претседател на државата со поддршка од најмалку 30 пратеници.
Новинари и водители не смеат да учествуваат во изборна кампања
Здружението на новинарите на Македонија ја повикува Македонската радио телевизија да го истражи случајот каде нивната вработена новинарка Гордана Ѓорчева, на 18-годишнината на Конференцијата на Унијата на жени на ВМРО-ДПМНЕ, се појави во улога на водител.
ЗНМ смета дека со овој ангажман колешката Гордана Ѓорчева го прекршила Изборниот законик, каде во членот 75-в е наведено дека: „Уредници, новинари, водители на програма и презентери, ангажирани во подготвување програми на радиодифузерите, не смеат да учествуваат во предизборни активности на политички партии, коалиции, групи избирачи и нивни претставници, односно учесници во изборна кампања“. Во Изборниот законик е предвидена и мерка доколку новинарот сепак се одлучи да настапи на партиски собир и таа гласи: „Доколку се определат да учествуваат во вакви активности, нивниот ангажман во програмите на радиодифузерите им мирува од денот на распишување на изборите до нивното завршување“.
Утре завршува конкурсот за пријавување за набљудувачи на изборниот процес
Конкурсот за пријавување на заинтересираните краткорочни и долгорочни набљудувачи на ЦИВИЛ за претстојните претседателски избори завршува утре (6 март) во 17 часот.
Предност за учество на овој конкурс имаат оние што веќе биле набљудувачи за организацијата во претходните изборни процеси, како и оние што ги посетувале семинарите за граѓанско новинарство. Сепак, сите заинтересирани треба да пополнат апликација, а посебна комисија ќе ја изврши финалната селекција. Едно од правилата е дека не може да се биде набљудувач за две организации истовремено. Партиски активисти немаат право на учество во овој повик.
М. Ивановска
