Новоизбраниот претседател на Собранието, Талат Џафери, утрово ги доби клучевите од неговиот кабинет, каде што го започна првиот работен ден. Џафери ги доби и печатите на Собранието, а на вратата на кабинетот е избришано името на неговиот претходник Трајко Вељановски.
Првата официјална средба на Џафери беше со амбасадорот на Европската Унија, Самуел Жбогар. Тој по денешната средба на својот Твитер профил напиша: „ЕУ е подготвена да работи со новиот претседател Џафери за потребните реформи за европска интеграција на земјата“.
Денеска се очекува одлуката за прогласување на претседател на Собранието да се објави во „Службен весник“, по што Џафери треба да испрати писмо до претседателот на државата Ѓорге Иванов, за да го информира за новото собраниско мнозинство и за мандатарот на новата влада, Зоран Заев.
Џафери денеска добил честитки и од генералниот секретар на Собранието, Жарко Денковски.
Претходно, во текот на вчерашниот ден, Џафери не успеа да влезе во својот кабинет затоа што просторијата беше зафатена од Вељановски и пратениците од коалицијата на ВМРО–ДПМНЕ.
Утрово започна и проценката на штетите во Собранието направени во четвртокот на 27 април, кога на демонстранти од „За заедничка Македонија“ им беше дозволено да упаднат во собраниската зградата.
