Војо Маневски
Го извртев Алан Форд за да ја прилагодам реченицата на состојбите кај нас. Грунф вели – ако не ни е подобро, ќе ни биде полошо. Таквата логика кај нас не важи. Ако не ни е подобро нека остане вака, како што ни е и да се чуваме од полошо. Ете, почитуван мој народе, зошто ја губме битката со сите поамбициозни народи во нашата блиска и подалечна околина. Ние не се бориме да ни е подобро туку да не не снајде полошо од ова што го имаме . Децата нѐ напуштаат, а нашиот менталитет на плашливци од секоја промена си го чуваме како идентитет.
За национализмот не сакам ниту да размислувам, ниту да пишувам. Поставувам едно мостопитно прашање. Кое општетсво е среќно и напредно, а во него да владеат националисти? Секој поединец што бара закрила зад колективитетот, во суштина, се плаши за сопствениот индивидуален идентитет и ставови. Социјалните мрежи биле безмилосни. Па кога обичните граѓани биле добри и милостиви? Само кога се сами и кога од нив се бара одговорност за кажаното или направеното. Медиумите денес се сведоа на леснотијата на изјавите на учесниците на социјалните мрежи. Без правила на пренесување на факти, контекст, два или повеќе извори и слични дрембулии од занаетот. ВИ ќе го уништела новинарството. Вакво какво што е кај нас, и треба да биде уништено и никој за него не треба да плаче.
Еве еден свеж пример од вчера, во мојот скроз провинцијализиран Штип.
Во медиумите вчера со трепарав глас на известувачите беше објавено дека некој во раните мугри со булдожер срушил дел од една куќа. Вест за насловна страна и поради времето на дејствието и поради објектот на активностите и поради средствата употребени во дејствието. Со булдожер рано наутро некој се осмелува да руши куќа!
Од сето ова вистина е дека времето на дејствието не соодветствува со законот. Каква е потребата толку рано да се спроведува нешто за кое има одлука на советот на општина Штип и на градежниот инспекторат од 2011 година?Прашање е зошто органот не постапил според законот и одлуките веќе 15 години. Има еден израз во турскиот јазик кој е објаснувачки ама ептен – јавашлук. Во тој израз се содржат и неефикасноста на правниот систем и неработата на надлежните органи. Куќата нема сопстевеник затоа што одамна е национализирана поради пречки во сообраќајот и повеќето сообраќајни несреќи што во текот на зимата се случија во последните скоро две децении. Кој не ми верува нека ги побара документите и одлуките на Советот на град Штип од 2011 година.
Пример за леснотијата на изразување на став и користење на социјалните мрежи за потикнување на разни негативни коментари е изјавата на граѓанинот кој се жалеше дека го разбудиле со рушење на неговата куќа. Тој дел од куќата ниту е негов ниту има право таму да спие. А и не можел да спие зошто две децении тоа е рушевина без улови за престој во неа, а камоли за спиење. Леснотијата на изразување став и лечење на разни фрустрации е јасна слика на нашиот површен менталитет на сеирџии и комшиски оговарачи. Како во онаа народна изрека – а бе, ако реков не пресеков.
Смешно е кога се доведуваат во контекст снимките на куќата која е без стакла на прозорците и видлива склонопадност и изјавите на граѓанинот. За коментарите на новинарите не сакам да коментирам . Леснотијата на правењето на прилог повлекува низа на последици ама само во општество каде одговорноста е вредност. Кога нема одговорност, медиумот е само уште една објава на социјалните мрежи без потреба од одговорност на новинарот и уредникот.
Еее, никој на овој народ не му доакал, е националистичка флоскула која бара одговор. Не треба никој да му доака сам тоа ќе си го стори.
Текстот е личен став на авторот | ЦИВИЛ МЕДИА
Во ера на дезинформации, националистички популизам и авторитаризам, неопходна е вашата поддршка за ЦИВИЛ.
Поддржете ги независните медиумски платформи на ЦИВИЛ во борбата против дезинформациите, национализмот, хибридните закани и авторитаризмот
Дајте го својот придонес СЕГА.
