Од денеска започна проектот за едукација на младите за начинот и придобивките од рециклирањето и правилниот третман на отпадот. Проектот се реализира преку иновативна и забавна театарска претстава „Зелена планета“, наменета за деца од прво до петто одделение. Театарскиот караван тргна од Скопје, со премиера во Драмскиот театар, а во текот на оваа година, предвидено е претставата да ја видат уште најмалку 10.000 деца во десет градови.
Проектот го реализира „Пивара Скопје“, заедно со Амбасадата на Холандија во Македонија и компаниите „Пакомак“ и „Нула отпад“.
Како што информираат за ЦИВИЛ Медиа од „Нула отпад“, „со претставата, преку интересен и пред сè забавен начин, на децата им се пренесуваат пораки за значењето на селектирањето и третманот на различен вид отпад, почнувајќи од хартијата, пластиката, стаклото, лимената амбалажа, па сè до електронскиот отпад“.
„Како што е случајот и со Холандија, за секоја општествена промена потребна е здружена акција на државните институции, граѓанското општество, деловниот сектор и граѓаните. Заедно со ‘Пакомак’ и ‘Пивара Скопје’, континуирано се обидуваме да дадеме пример за ова – преку акции за чистење и возење велосипед, како и преку промовирање на одржлив начин на живеење. Ми претставува задоволство што денеска заедно отпочнуваме нова иницијатива, насочена кон запознавање на децата со културата на рециклирање, бидејќи децата секогаш се идните носители на општествените промени“, изјави амбасадорот на Кралството Холандија, Ваутер Пломп.
Како дел од платформата „Дали рециклирате?“, претходно беше реализирана и акцијата за чистење спроведена на дел од Кејот на реката Вардар во Скопје, во чии рамки вработените на „Пивара Скопје“ и на холандската Амбасада, со логистичка поддршка од „Пакомак“, го собраа целокупниот сув отпад кој понатаму беше селектиран и рециклиран.
М. Теговска
