Алијансата за Албанците на Зијадин Села и Движењето Беса предводено од Билал Касами бараат од премиерот Зоран Заев да ја повлече изјавата за формирањето на војската во Косово.
Според партијата на Зијадин Села, со последниот став, дека одлуката за формирање на војска во Косово е избрзана „само го покажува црното и националистичко лице на премиерот Заев, најпрвин против Албанците и Косово, но и кон САД како главни поддржувачи на основањето на Војската на Косово.“
„Овој речник на Заев за Војската на Косово го става под знак прашалник и неговиот однос кон САД, бидејќи едно Косово без војска ќе им одговараше само на Србија и Русија. Затоа, премиерот Заев е добро да го гледа својот двор и да ги спроведе потребните реформи во Македонија и да не се меша во внатрешната политика на државата на Косово. Алијансата на Албанците бара од премиерот Заев што побрзо да ја повлече својата изјава и да му честита на Косово во името на Македонија“ – се вели во реакцијата на Алијансата за Албанците.
Движењето Беса предводено од Билал Касами, пак, цени дека Косово е независна држава и има легитимно право да има војска за заштита на територијалната целина и слободата на нејзините граѓани. Избрзаната изјава на премиерот Заев против Војската на Косово, според оваа партија, колку е навредлива за една слободна држава, исто толку звучи како и национализам од минатото време.
„Движењето Беса бара од премиерот на земјата да се дистанцира од оваа скандалозна изјава и да бара јавно извинување, кога се знае дека формирањето на војската на Косово ја има и силната поддршка од САД. Неговата изјава го одразува вистинското лице на „мултиетничката“ Македонија, ги прави да се чувствуваат навредени и Албанците на оваа земја, кои му дадоа полн мандат за да владее, а не за да зборува глупости и национал-комунистички варваризми“ – се вели во реакцијата на партијата на Билал Касами.
Инаку, во одговор на новинарско прашање по повод формирањето на Косовските одбранбени сили, премиерот Зоран Заев ги цитираше НАТО и ЕУ, ценејќи дека тој е избрзан чекор и дека Балканот не сака да биде буре барут.
Арбен Зеќири
