Масовни убиства, мачење, силување, киднапирања, депортации, грабежи, уништена инфраструктура која остави милиони луѓе без греење, вода и струја среде зима. Во 21 век имаше 365 дена страдање, страв и криза во Украина со ефекти низ цела Европа и во целиот свет, но и 365 дена извонреден украински отпор и храброст, кои ги почитуваме додека жалиме по загинатите и изразуваме солидарност со оние кои ги загубија своите најблиски и нивните домови, рече Амбасадорот на Европската унија во Северна Македонија, Дејвид Гир на денешната конференција „Украина – година на хероизмот“, на невладината организација за човекови права и слободи, ЦИВИЛ – Центар за слобода и Амбасадата на Украина во Република Северна Македонија.
-24 февруари 2022 година секогаш ќе се памети како денот кога Русија ја започна својата брутална, неиспровоцирана и незаконска инвазија на Украина. Ова беше и останува случај на чиста агресија и јасно прекршување на Повелбата на ОН. И ова не е само агресија против Украина, тоа е закана за демократијата во светот и до сите земји. Бидејќи она што е во прашање е нивниот суверенитет – нивното право да одлучуваат за својата и за иднината на своите деца, додаде тој.
Според Гир Повелбата на ОН мора да биде заштитена според која Украина, како жртва на агресија, има вродено право да се брани.
-За ЕУ и нашите партнери, вклучително и Северна Македонија, нема алтернатива за останување на курсот на нашата „тројна стратегија“: поддршка на Украина, вршење притисок врз Русија да престане со нејзината нелегална агресија и помагање на остатокот од светот да се справи со поширокото влијание на војната. ЕУ ќе остане одлучна и обединета во својата поддршка за украинскиот народ на сите фронтови: хуманитарен, економски, политички, дипломатски и воен. Украина мора да победи. А европската безбедност е заштитена, додаде Гир.
Тој појасни дека тимот Европа досега има мобилизирано 50 милијарди евра за поддршка на Украина, вклучително и воена помош. Да, за прв пат досега, ЕУ испорача оружје на земја која е нападната. И ЕУ сега е водечки снабдувач на воена обука за украинскиот воен персонал за да можат да ја бранат својата земја.
ЕУ нуди многу значајна макрофинансиска и хуманитарна помош за поддршка на украинскиот народ. И решивме позитивно да одговориме на барањето на Украина за пристапување во ЕУ. Конечно, работиме на барање одговорност за воените злосторства што ги изврши Русија, и со помагагаме да се формира Меѓународен центар за гонење на кривично дело агресија против Украина, рече Гир.
Според него паралелно, ЕУ и нејзините партнери усвоија санкции без преседан против Русија дасе намали нашата зависност од руските фосилни горива. И во тесна соработка со клучните партнери ги намаливме за 50% приходите од енергија што Кремљ ги добиваше за финансирање на својата агресија.
-Работејќи заедно, ги ублаживме и глобалните бранови ефекти со опаѓање на цените на храната и енергијата, делумно благодарение на нашите патеки за солидарност и на иницијативата за пренос на житото преку Црното море. Друга кампања на која мора да се спротивставиме е руската информативна војна. Нејзината агресивна воена пропаганда и дезинформации вклучуваат оправдување или негирање на злосторствата, нормализирање на окупацијата и префрлање на вината за инфлацијата, кризите со храна и енергија на земјите кои ја поддржуваат Украина, додава тој.
Гир посочи дека сведоци сме и на ефектите од руската пропаганда на Западен Балкан. Вклучувајќи и загрижувачко присуство на дезинформации во Северна Македонија. Затоа ЕУ работи со партнерите, особено со нашите идни земји-членки, за да се спротивстави на оваа закана. Ова значи дополнителна поддршка за слободата на медиумите и политичкиот плурализам. Но, тоа значи и дека медиумите имаат одговорност да обезбедат објективни информации на својата публика и на тој начин да ја зајакнат општествената отпорност на манипулации.
Овде би се потсетил на зборовите на водечкиот воен дописник на Си-Ен-Ен, Кристијан Аманпур, дека објективноста не значи да се биде неутрален ако тоа создава лажна морална или фактичка еквиваленција; дека новинарите никогаш не треба да ја третираат жртвата исто како и агресорот; и дека во известувањето за војна е важно да се биде вистинито, а не неутрално.Со цел да покаже дека ЕУ и регионот се во ова заедно, ЕУ работи со Западен Балкан за да го намали негативното влијание што произлегува од руската војна врз Украина во однос на економијата, енергијата и безбедноста на храната. Само за Северна Македонија, ЕУ обезбедува 80 милиони евра за да помогне во ублажување на влијанието на зголемените цени на енергијата врз граѓаните, макрофинансиска помош, како и дел од дополнителните 500 милиони евра за Западен Балкан како дел од нејзиниот енергетски пакет, рече Гир.
Тој порача дека ЕУ, нејзините земји-членки и оние партнери во регионот, со перспектива за членство во ЕУ, имаат одговорност да ја спроведат визијата за Унијата, а ова значи дека ЕУ и Западен Балкан треба да застанат заедно во одбрана на нашите заеднички вредности и меѓународниот поредок заснован на правила.
-Северна Македонија покажа примерно морално лидерство со целосно усогласување со надворешната и безбедносната политика на ЕУ за Русија. И веќе прави значителни напори, во овој поглед, како претседавач со ОБСЕ. Работејќи заедно, имаме шанса да го вратиме мирот во Европа. И да се фокусираме на создавање просперитет за сите граѓани. Ова значи градење поотпорни и инклузивни општества и економии, развој и заштита на нашите демократии и зајакнување на социјалната кохезија.
