Демократите во Надворешнополитичкиот одбор на американскиот Сенат претставија извештај посветен на руското влијание врз изборите во други земји. Демократите во извештајот апелираат до администрацијата на Трамп странското мешање во изборите да се третира како национална криза, да се формира агенција која би кооридинирала одговор на мешањето и да се воспостави нов вид на санкција за казнување на одговорните.
Во текстот на 200 страници, чија подготовка ја побара сенаторот Бен Кардин, по победата на Трамп, детално се опишуваат „речиси дводецениските“ руски напори да влијаат врз изборите во Европа. Исто така, се критикува и Трамп што малку направил за решавање на таквиот проблем.
Демократите во препораките, меѓу другото, наведуваат дека е потребно да се изградат демократски институции во земјите кои се најподложни на мешање во изборите и да се формира организација слична на Националниот центар за борба против тероризмот, која би ја координирала американската реакција на таквото мешање.
Во извештајот се предлага и американските функционери, вклучително и членовите на Конгресот редовно да патуваат и да примаат високи гости во Вашингтон од земјите кои се подложни на странско мешање во изборите.
– САД треба да испратат јасна порака дека се враподготвени да соработуваат со земјите и сојузниците ширум Европа, за да се одбранат од злокобното влијание и би им помогнале на тие држави да го довршат процесот на интеграција, се посочува во извештајот.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
Одговорноста за редакциското опремување на текстовите (наслов, наднаслов, фотографија, тагови) е на ЦИВИЛ Медиа.
