Државната комисија за спречување на корупција (ДКСК) одговори на барањето за пристап до информации од јавен карактер што ЦИВИЛ го поднесе кон средината на декември минатата година.
Барањето од ЦИВИЛ се совпадна со реакцијата на ДКСК на колумната „Да виси ДКС“ од Сашо Орданоски објавена на 12 декември 2016 на ЦИВИЛ Медиа.
ДКСК своевремено реагираше со осуда на наводите содржани во текстот кои се насочени кон ширење на невистини, дискредитација и јавен повик за линч на Државната комисија за спречување на корупцијата и на нејзините членови.
Во своето соопштение тие обвиниија за непрофесионализам и неетичко однесување и побараа да се повлече текстот. ЦИВИЛ возврати дека нема намера никогаш да се повлече и повика на одговорност и транспарентност.
ЦИВИЛ упати барање според Законот за пристап до јавни информации, во кое побара неколку информации, меѓу кои и број на оформени предмети поради сомневање за постоење на корупција и за кои предмети се работи. Исто така, ЦИВИЛ побара од ДКСК да обелодени податоци за патните трошоци во земјата и во странство, како и причините и резултатите од тие патувања, трошоци за репрезентација, сите јавни набавки и трошоци за комуникација во периодот 14 април 2015 до 12 декември 2017 година.
Дел од одговорноста за доцнењето на одговорот на овие прашања, ДКСК префрли на Службата за општи и заеднички работи на Владата: „На имателот на информациите му е потребно подолго време од рокот утврден во член 21 од Законот за слободен пристап на информации од јавен карактер, поради што истиот се продолжува, согласно член 22 став 1 од истиот закон. Причина за продолжување на посочениот рок е обемноста на браните информации-податоци, потребата од обезбедување на поголемиот дел од истите од Службата за општи и заеднички работи на Владата на Република Македонија (СОЗР), која врз основа на извршување општи и заеднички работи и услуги, ги извршува сметководствените работи за Државната комисија за спречување на корупцијата, како и недоставувањето на податоците до Државната комисија од страна на СОЗР, побарани со писмено барање на Државната комисија“. – се вели во одговорот до ЦИВИЛ.
„Македонската јавност има законско право да очекува одговори на овие прашања. Ние имаме уште прашања до ДКСК, но и до неколку други институции во државата.“ – кратко изјави Џабир Дерала, Претседател на ЦИВИЛ.
Биљана Јордановска