„Во рамките на стратегијата за регионален развој, ние имаме пред се проблем како да успееме да детерминираме во државата каде и колку пари да се завршуваат од буџетот на Македонија во пооделните подрачја и како тоа да биде контролирано и рамномерно распределено. Ние имаме одлука дека 1 % од бруто домашниот производ треба да биде наменет за регионален развој“, изјави Кочо Анѓушев, Претседавач на националниот Совет за рамномерен регионален развој при Владата на Република Македонија, на денешната конференција „Политиките за рамномерен регионален развој“.
Анѓушев нагласи дека е предизвик да се направат добри проекти што ќе осигураат парите да завршат онаму каде што се потребни, а со тоа ќе се направи обид да се намали и корупцијата. Анѓушев, како што вети во своето обраќање, остана до крај на првата сесија.
Конференцијата е завршен настан на проектот „Алијанса за регионален развој“, инициран и спроведуван од Форум – Центар за стратешки истражувања и развој, Скопје и Младински иницијативи за дијалог и соработка, Битола, а поддржан од Европската Унија.
Во рамки на конференцијата беа презентирани истражувањата и анализите спроведени во рамки на проектот и споделени заклучоците поврзани со политиките за рамномерен регионален развој кои се спроведени во последните десет години како и препораките за воспоставување поефикасни механизми за развој на планските региони и намалување на диспаритетите помеѓу регионите.
Во првата сесија воведничари беа и Никола Беротлини, Раководител на Сектор за соработка, Делегација на Европската Унија, Сухејл Фазлиу, Министер за локална самоуправа на РМ и Емил Василев, Координатор на проекти, Центар за развој на Источен плански регион, Мима Станоевска, Раководителка на одделение за имплементација на прокети и меѓународна соработка, Центар за развој на Југоисточен Плански регион и Дончо Герасимовски, Секретар на Општина Центар, поранешен директор на Завод за статистика на РМ.
Биљана Јордановска
Камера: Атанас Петровски
Монтажа: Даниела Нисева
