Македонија како мултиетничка држава после 30 години независност мора на пиедесталот на своите општествени односи да ги издигне и да ги испочитува етничките првила на поведение и живеење. Мора да имаме меѓуетничка толеранција, мора говорот на меѓуетничка омраза да замине во историјата, и Македонија да стане вистинско граѓанско мултиетничко и мултикултурно општество каде што јазичните, културите, родовите права ќе бидат издигнати на пиедесталот за Македонија да стане конечно еманципирано општество кое со трендовите во 21 век ќе зачекори напред, бидејќи Македонија декларативно и суштински и формално правно сака да стане полноправен член на семејството на европските народи, вели политикологот Благојче Атанасовски за ЦИВИЛ Медиа.
„Единствениот пат за Македонија да биде успешно унитарно комплементарно општество мора се повеќе и повеќе да се издвојуваат почитувањето на човековите права, почитувањето на меѓуетничките разлики, издигнувањето на правата на етничките заедници, но не да станат колективни права и Македонија да заврши во еден вид бинационална држава, односно да стане вистинска граѓанска држава каде што човекот пред сè, односно граѓанинот пред сè, кој што ќе ги користи сите свои права, етнички, религиозни, јазични, социјални, културолошки, но исто така ќе има и обврски кон државата бидејќи сепак односот граѓанин – држава подразбира и права и обврски.
Македонија е веќе уморено општество од меѓуетнички и меѓурелигиски поделби, говорот на омраза особено на меѓуетничките поделби, и отука мора да извлечеме поука од нашето 30-годишно функционирање и врз база на таа поука комплетно политички и општествените односи да ги промениме. За тоа да станеме реалност и факт како што го зборам ова реторички, мора политичките партии и елити да излезат од својот кожурец на етничката припадност. Македонија трена да ги напушти т.н. етничките политички блокови, македонски, албански, и останати блокови од етничките заедници, односно партиите во Македонија да го напуштат етничкиот предзнак, да не им се обраќаат само на граѓаните од својата етничка припадност, туку на база на идеолошка платформа и врз база на понудени решенија тие да се легитимираат од сите граѓани без разлика на нивната етничка и религиозна припадност“, истакна Атанасовски.
Камера и монтажа: Ариан Мехмети
Оваа содржина е дел од иницијативите и проектите на ЦИВИЛ за промоција на мултикултурализмот и европските вредности, со поддршка од Министерството за надворешни работи и европски прашања на Големото Војводство Луксембург. Ставовите и мислењата изнесени во овие содржини се на самите Автор(к)и и не нужно ги отсликуваат официјалните ставови на донаторите.
