Министерството за информатичко општество и администрација утре, со почеток во 11:30 во Клубот на пратеници, ги покани медиумите и сите засегнати страни, како и сите заинтересирани граѓанки и граѓани, на јавна дискусија за реформите во медиумскиот сектор.
Говорниците Дамјан Манчевски, министер за информтичко општество и администрација и Роберт Поповски, министер без ресор, задолжен за комуникации, отчетност и транспарентност, во своите воведни излагања ќе ги презентираат клучните приоритети и мерки на Владата за реформи во медиумскиот простор во Македонија.
Јавната дискусија им дава можност, со свои предлози и препораки за измени во законската регулатива, медиумските експерти, новинарите, медиумските асоцијации, граѓанското општество и меѓународната заедница да придонесат во процесот на медиумските реформи.
Дискусијата ќе ја модерира Марија Теговска, а на присутните ќе им се остави простор за развивање на сеопфатна и инклузивна дискусија.
Прв настан на МИОА, беше работна средба со претставници од граѓанските организации, експерти, претставници од меѓународната заедница и од здруженија и асоцијации на медиуми за реформи во администрацијата.
Тогаш, министерот Манчевски вети дека соработката со граѓанските организации нема да запре во процесот на имлементација на планираните активности на Министерството, за што најави формирање на Консултативен совет за имплементација на клучните реформски приоритети.