Општина Студеничани зазема површина од 274 километри квадратни и се вбројува во средно големите општини во Република Македонија. Во состав на општината има 19 населени места, од кои 18 се постојни, а едно село е наполно раселено, Калдирец. Централно место и седиште на општината е Студеничани, а другите населби се Батинци, Драчевица, Долно Количани, Горно Количани, Црвена Вода, Алдинци, Цветово, Елово, Црн Врв, Маркова Сушица, Вртекица, Малчиште, Умово, Пагаруша, Осинчани, Рамни Габер и Морани.
Во општина Студеничани има три централни училишта, а во сите други населени места функционираат подрачни основни училишта.
Ова е ваш трет мандат како градоначалник на општина Студеничани. Во каква состојба е општината, односно во какви финансиски, кадровски и просторни услови и кои се најголемите проблеми со кои се соочувате?
– Пред неколку месеци го почнав мојот трет мандат, втор последователен. Сите општини во Македонија се соочуваат со многу финансиски проблеми, а посебно руралните, како нашата општина бидејќи дадени се многу обврски на општините додека многу мал процент на средства се слеваат во буџетот на општините.
Еден од најголемите проблеми досега ни беше патната инфраструктура, но благодарение на нашата макотрпна работа во претходниот мандат, дел со наши средства, а многу повеќе со грантови од ИПА успеавме да изградиме многу локални патишта. Со тоа остана уште многу малку за завршување со изградба на сите главни улици на територијата на општина Студеничани, секако тука не влегуваат малите улички, рече Садики.
Што е тоа што треба да се промени за состојбата во општината да се подобри?
– Најпрво државата треба да одобри, односно да го зголеми процентот на данокот кој се исплаќа на општините. Исто така централната власт треба да ги поттикне општините со финансиски средства за реализација на важни проекти за луѓето кои живеат во тие општини.
Без сериозна поддршка од страна на централната власт за важните проекти како што се водоснабдување, фекална, канализациска и патна инфраструктура не може да се смени состојбата во руралните општини. Ние сме подготвени, имаме проекти, со кои аплицираме на секој јавен повик, посочи Садики.
Кои се приоритетите во Вашата работа и идни проекти кои треба да се реализираат во општина Студеничани?
– Во овој мандат со мојот тим сакаме повеќе да се осврнеме на нови проекти, како што се изградба на градинки бидејќи во нашата општина немаме воопшто градинка. Исто така ја завршивме целата проектна документација за изградба на зграда за прво средно училиште во општина Студеничани. Во моментов имаме поднесено барање за финансирање на овој проект во Министерството за образование и наука, како и во неколку странски агенции кои се присутни во Македонија. Се надеваме дека ќе добиеме позитивен одговор со што би се решил еден многу значаен проект за нашата општина.
Имаме проекти за инфраструктура и тоа патна, канализациска и водоводна мрежа со кои аплицираме во сите отворени повици за грантови во објавите на Светска банка, како и други донатори, нагласи Садики.
Магдалена Ристоманов
Извор: МИА