ВЕСТ НА ДЕНОТ
Ковачевски на Самитот „Отворен Балкан“: Низ конкретни чекори ја унапредуваме регионалната соработка, на патот кон ЕУ – Отворен Балкан е функционална иницијатива
Во своето обраќање на лидерскиот самит на „Отворен Балкан“ во Белград, премиерот Димитар Ковачевски кажа дека меѓу Северна Македонија, Србија и Албанија не треба да има граници. Тој посочи оти не му е јасно како странските земји кои меѓусебе немаат граници финансираат проекти во Западен Балкан за подобро гранично управување.
„Отворен Балкан“, заклучи Ковачевски, се покажа и неопходен оти, како што кажа, ако ние успееме да сме добри за нас, тогаш сигурно ќе сме добри и за Европа и за светот.
ИЗЈАВА НА ДЕНОТ
Западен Балкан е едиствен регион каде што границите се толку цврсти, каде што со часови се чека да се помине, и компаниите и граѓаните. Нашата цел е, со иницијативата „Отворен Балкан“ тие бариери што стојат на патот на брзо и лесно преминување на границите, и соработка меѓу граѓаните и компаниите, да ја постигнеме што побргу. Наша цел е да ги тргнеме бариерите и не да ги тргнеме границите, туку да оствариме ниво на соработка која ќе ги направи тие граници се помалку важни, изјави за ЦИВИЛ Медиа вицепремиерот за европски прашања и Бојан Маричиќ, денеска на Самитот „Отворен Балкан“ што се одржува во Белград.
ФЛЕШ ВЕСТИ
ПРАВДА Обвинителство ги распореди предметите на Русковска за Управата за финансиска полиција и за „Виа Комерц“.
БЕЗБЕДНОСТ Министерството за внатрешни работи (МВР) и Републичкиот совет за безбедност на сообраќајот на патиштата (РСБСП) со почетокот на новата учебна 2022/2023 година почнаа со превентивни активности под мотото „Да ги заштитиме децата во сообраќајот“, кои ќе се реализираат во текот на целата учебна година.
СОБРАНИЕ Собраниската Комисија за прашања на изборите и именувањата на денешната седница треба да ја продолжи дебатата за предлозите за избор на судии на Уставниот суд на Република Северна Македонија
ВОЈНА ВО УКРАИНА
Вооружените сили на Украина ги натераа руските трупи да се повлечат во правците Славјанск, Бахмут, Новопавливка и Авдиивка, соопшти Генералштабот на вооружените сили на Украина преку објава на Фејсбук, пренесува Укринформ.
*
Генералниот директор на Меѓународната агенција за атомска енергија (МААЕ), Рафаел Гроси по првиот ден од работењето на мисијата во нуклеарната електрана во Запорижја изјави дека физичкиот интегритет на овој енергетски капацитет е нарушен, пишува Гардијан.
СЛОБОДНА ЗОНА
„Мораме да се ослободиме и од лажниот баланс. Никаде не води таа континуирана релативизација во јавната комуникација. Техниката со која се одговара на обвинение или тешко прашање со контраобвинение или покренување сосема различно прашање whataboutism, стана модел на вообичаено однесување на голем број политичари, јавни личности и креатори на јавното мислење. Терминот, чина, дека не е преведен на македонски сѐ уште, но сесрдно се користи како пракса.
Мораме конечно да започнеме сериозно да се занимаваме и со пропагандните техники од времето на Советскиот Сојуз што се супер актуелни во денешно време. Крајно време е да разбереме дека наша обврска е да се справуваме со дезинформации, а не да ги пренесуваме (објавуваме)“, пишува Џабир Дерала во колумната „Ако не е веќе доцна. А доцна е“. Можеби предоцна.
„Пост-ЕУ сигналите, односно сигналите после официјалното отпочнување на преговорите со ЕУ, ја сигнализираат истата матрица од пред ЕУ почетокот. Слично како и третманот на отворањето на уставот и внесот на Бугарите во преамбулата на истиот. Скриена позади сите други (Хрвати, Црногорци итн.). Враќањето на сцената на наративот кој доведе до ескалација и невиден страв од ЕУ преговори, е голем сигнал“, пишува Никица Корубин во колумната „Пост-ЕУ сигнали“.
„Кога премиерот Ковачевски рече „Балканот е отворен“, за мене тоа, пред сè, значи дека сите во иницијативата „Отворен Балкан“ ќе делуваат на рамноправни основи и дека минатото нема да биде посилно од сегашноста и иднината. На конкретен пример тоа би значело дека пазарите на стока, капитал и проток на луѓе се отворени, што дополнително би значело дека Србија и БиХ ќе мора да најдат снага во себе и го признаат Косово, и така сите заедно да воспоставиме добрососедски односи, како и во секоја поединечна држава внатре меѓу своите сограѓани. Паралелно со тоа, ќе мора да тече процесот на соочување со минатото во сите држави од регионот“, пишува Ненад Јовановиќ во колумната „Свои на своето со „Отворениот Балкан“.
„Она што „Фамилијата“ го правеше, особено во периодот од 2011 до 2016, е многу поголемо разнебитување, угнетување и уништување на идентитетот и Македонија. Криминалот кој го „спроведоа“ ја доведе државата до изолација, приватен сектор кој уназадува, а идентитетот поништен. Криминалот, кражбата, загрозувањето на слободата на граѓанинот е вистинското угнетување на еден народ за кој ретко кој од денешените „фаци“ пишуваше“, пишува Сотир Габелоски во колумната „Како се разнебитува македонскиот идентитет?“.
Д. Муратов
