Иновативна инцијатива која повикува на одговорност и транспарентност, „Барам одговор“ е начин граѓанките и граѓаните да се обратат со прашање до политичар/политичарка или јавна личност, градоначалник/градоначалничка, институции (здравство, образование, полиција, труд и социјала…), за кои сметаат дека треба да дадат одговор за некое прашање кое нив лично или сите нас нѐ засега.
Сѐ што треба да се направи е, преку видео или селфи видео, да се постави прашањето и да се испрати до ЦИВИЛ, по што снимката се објавува. Доколку граѓан(к)ите сакаат да останат анонимни, оставена е опција да се снима објект или некоја ситуација, додека се поставува прашањето.
Барам одговор од челниците на ВМРО кога ќе почнат да ги фарбаат институциите? Барам одговор од Владата дали има план да ја подобри родовата рамноправност во својот состав и во институциите? Барам одговор дали Министерството за администрација мисли да направи ревизија на вработените во јавната администрација и да започне постапка за престанок на работен однос по член 68 од законот за јавни службеници на оние вработени кои се на платен список, а физички се отсутни, или и понатаму ќе продолжат со игнорирање на законот? – се само дел од прашањата кои ги поставија граѓанките и граѓаните откако започна иницијативата пред неколку недели.
Прашања беа поставени и до Државната изборна комисија и релевантните институции од кои се очекува да работат на подобрување и ревизија на Избирачкиот список на кое за жал не добија одговор. До ДИК се постави и прашањето: Оставки кога? Истиот ден оставките почнаа да пристигнуваат од членовите на ДИК.
#БарамОдговор од ДИК: Оставки кога?, прашање на Денис Јанкуловски беше награден прилог во првиот циклус награди од имплементирањето на третата година од проектот за граѓанско новинарство, „Граѓански објектив“.
ЦИВИЛ ги повикува сите граѓан(к)и, заинтересирани да бидат граѓански новинари, како и сите граѓански новинари кои досега учествувале на семинарите од проектот „Граѓански објектив“ или соработувале со организацијата да земат учество во проектот и на тој начин да се квалификуваат за една од вредните награди за граѓанско новинарство, но и да бидат дописни соработници на Редакција ЦИВИЛ Медиа.
Граѓаните своите прашања треба да ги испраќаат во видео формат (селфи-видео) на фејсбук страницата на ЦИВИЛ, фејсбук страницата на граѓанските новинар(к)и (приватна порака) или на civil.macedonia@gmail.com.
Б. Јордановска
