Целта на кампањата „Биди фер“, која денес ќе биде претставена во Музејот на современа уметност, е подигнување на нивото на свеста за социјалниот модел на попреченост, дефиниран во Конвенцијата на ОН за правата на лицата со попреченост.
Кампањата која се спроведува како дел од проектот „Заштита на децата од насилство и унапредување на социјалната инклузија на децата со попреченост во Западен Балкан и во Турција“, финансирана од ЕУ и кофинансирана од УНИЦЕФ, ќе биде претставена од министерот за труд и социјална политика Ибрахим Ибрахими, раководителот на Одделот за соработка при Делегацијата на ЕУ, Никола Бартолини и заменик-претставникот на УНИЦЕФ, Елспет Ериксон.
„Сакаме да ја подигнеме свеста дека поради пречките во средината, општеството и ставовите, децата со попреченост не можат да учествуваат во општеството на рамноправна основа со другите деца“, порачуваат од УНИЦЕФ.
Кампањата чија цел е мобилизација на јавната свест и обезбедување на широка поддршка за правата и за вклучувањето на децата со попреченост во општеството и поттикнување на македонските граѓан(к)и да се идентификуваат со бариерите со кои секојдневно се соочуваат децата со попреченост.
Кампањата опфаќа „видео-снимка со скриена камера, во која се доловува како луѓето реагираат кога ги услужува аптекарски помошник што има Даунов синдром – посочувајќи дека Даунововиот синдром не ги спречува младите да го остварат својот потенцијал – но, ставовите и однесувањето на луѓето може да бидат или охрабрувачки, или да претставуваат пречка; потоа, неколку видео-материјали во кои се истражуваат предизвиците на движење низ градот, кога се користи количка, истакнувајќи како физичките бариери може да го спречат детето да учествува; и еден експеримент, каде на деца со и без попреченост, им се дава можност да ја покажат способноста за играње ‘голбол’, параолимписка дисциплина која ја играат спортисти со оштетен вид – покажувајќи како адаптираните средини го олеснуваат учеството“.
Дел од кампањата е и изработената апликација за мобилни телефони – „Без пречки“, за информирање и вклучување на јавноста во мапирање на примерите за пристапност во Македонија: пристапни згради, пешачки патеки и премини, пристапен јавен транспорт, паркинзи, детски игралишта и тоалети, пристапност и еднаков третман за лицата со оштетен слух.
