„Во овој момент имаме една состојба каде што политичката сцена е киднапирана или затворена за посебно избрани политички актери на кои им е дозволено да бидат на таа сцена. Сите други кои не сме именувани не ни е дозволено да бидеме на таа сцена сме оставени да кружиме околу и да не покажеме дали сме подобри или полоши актери од постоечките… Големите партии или оние што се присутни на сцената имаат специјални методи како да не задржат надвор од таа сцена. Ние, пак употребуваме специјални методи како да се појавиме на таа сцена. Една од тие методи беа реформите во ВМРО-ДПМНЕ, нешто што беше битка за интерпартиска сцена, а сега е Македонски концепт, нешто што е битка за државна сцена“, вели Петар Богојески во интервјуто за ЦИВИЛ МЕДИА, кој на јавноста ѝ стана познат како еден од предводниците на групата Реформатори на ВМРО-ДПМНЕ.
Овој пат ставаме акцент од интервјуто токму на делот што се однесува на реформите на ВМРО- ДПМНЕ, преку кратко резиме на личните заложби на Богојески како долгогодишен член на партијата и резиме на круцијалните моменти на партија што под раководството на Груевски се претвори во режим.
„2009/2010 година кога видов дека господинот Груевски комплетно ги напушта заложбите за кои се договоривме дека ќе работиме, а тоа е преродбата, да се спротивставам на она што се случуваше. Тотално спротивставување настана во 2010 година на Битолскиот конгрес, кога официјално беше приватизирана ВМРО-ДПМНЕ, од семејството Груевски, би рекол. Од тогаш вие, граѓанските организации, започнавте да не нарекувате „Фамилијата“. На нас во ВМРО не ни беше воопшто пријатно тоа да го слушаме. Иако од внатре знаевме што се случува, дејствувавме колку можеме и не можеме.
Се обидовме да направиме реформи во 2014 година… тоа беше макотрпно, ќе направевме еден тим, па тој ќе се распаднеше, ќе направевме друг тим и тој ќе се распаднеше, но ќе останеа еден, двајца активисти верни на сознанието дека можат да се направат некои промени во политичкиот спектар во земјата, но пред сѐ во внатре во самата партија. Иако стегите на власта не попуштаа, растеше граѓанскиот отпор. Како надворешно тој растеше, така на нас внатре во партијата ни стануваше полесно да иницираме реформи… не велам дека сме безгрешни, напротив, можеби одбравме погрешен момент и погрешен метод. Многумина рекоа ние сме со вас, но не се приклучуваме бидејќи пристапот не ви е исправен. Можеби и со право. Луѓето се плашеа да се поздрават со нас на улица, по првата конференција на Реформаторите…“, објавнува Богојески.
Петар Богојески е иницијатор на Македонски концепт, граѓанска иницијатива која понуди граѓански листи на кандидати за пратенички и пратеници на претстојните избори.
Разговорот го водеше: Џабир Дерала
Камери: Атанас Петровски и Ариан Мехмети
Фотографија и обработка на текст: Биљана Јордановска
Монтажа: Ариан Мехмети
Богојески: Груевски мене ништо не ми згреши, им згреши на граѓаните на Македонија
Петар Богојески од Македонски концепт говори за гревовите на минатото и визиите за иднината