УТРИНСКИ КОЛУМНИ
Се очекуваше дека руските претставници во Виена подобро ќе ја разберат загриженоста на членките на ОБСЕ за безбедност и мир во Европа. Бидејќи, сепак, ОБСЕ не е само платформа за соработка на 57-те држави членки, туку и за заедничка приврзаност и одлука на државите членки да градат мир во Европа и иднина без конфликти и војни.
„Сакаме да посветиме поголемо внимание на безбедноста на просторот на ОБСЕ и даваме можност на секоја страна да ги изнесе своите ставови,“ изјави Рау, нагласувајќи дека е неопходно сите страни да се фокусираат на мирно разрешување на конфликтот со почитување на територијалниот интегритет и суверенитет на Украина во рамките на меѓународно признати граници.
Полска, како претседавач на ОБСЕ ќе се фокусира на зачувување на мир во регионот од Ванкувер до Владивосток.
Генерална оценка и по третата рунда на разговори е дека воената реторика на Русија и натрупување на повеќе од 100.000 војници во близина на украинската граница, претставува притисок на САД и европските сојузници да ги прифатат условите и желбите на Кремљ, , анализа на Александар Николиќ Писарев во колумната„Русија не ја разбира пораката на Европа“
Галевски, Писарев, Биљали и Дерала, дел од гостите во денешното издание на „Утрински брифинг“ со Орданоски
Во денешното издание на „Утрински брифинг“ со Сашо Орданоски, како и секогаш повеќе од десет гости ќе говорат на најактуелните теми во земјава и во светот. Меѓу првите гости беше филмскиот критичар Влатко Галевски. На тема украинско-руска криза, во тек е гостувањето на истражувачкиот новинар Александар Н. Писарев од ЦивилМедиа. Следи гостувањето на проф. Мерсел Биљали, а на програмата е предвиден и Џабир Дерала од ЦИВИЛ, по повод најновиот извештај на Хјуман Рајтс Воч 2022.
Нова рубрика „Брза пошта“ – Вашите мисли и опсервации, жолти и црвени картони, кратки белешки и пораки, отсега во брза пошта. Останете гласни!
Цивилмедиа.мк воведува нова рубрика – „Брза пошта“, каде што авторките и авторите можат да ги овековечат своите мисли, белешки и пораки. Во трката со времето, често се нема време за пишување долги и елаборирани коментари и анализи, а потребна е брза реакција. Затоа, Редакцијата одлучи да отвори таков простор кој може да послужи и како своевидна комуникациска алатка, размена на мисли и пораки, но и вовед во пошироки анализи и мислења.
НАСТАНИ
ПРОГРАМА: Програмата и приоритетите на француското претседателство со Советот на Европската Унија денеска на прес-конфереција ќе ги претстави францускиот амбасадор во земјава Сирил Бомгартнер. Амбасадорот Бомгартнер вчера ги презентираше приоритетите на француското претседателство пред членовите на Националниот совет за евроинтеграции во Собранието.
– Зајакнување на европската сила и моќ, заштита од безбедносните, но и секаков друг вид предизвци со кои се соочува ЕУ, заштита на здравјето на граѓаните, економската обнова, но и активности за зајакнување на чувството на припадност се дел од приоритетите за време на француското претседателство со Советот на Европската Унија за период јануари-јуни 2022 година, најави Бомгартнер.
ПРЕС: Прес – конференција на министерот за правда Бојан Маричиќ во Министерство за правда. Настанот ќе биде организиран според здравствените протоколи ( носење на заштитна маска и потврда за вакцинација).
ПРЕЗЕНТАЦИЈА: Дирекцијата за технолошко-индустриски и развојни зони денеска ќе ја презентира анализата за економските движења во индустриските зони во 2021 година. На прес-конференцијата, што ќе се одржи во медиа центарот во Владата, ќе се обрати директорот на Дирекцијата на ТИРЗ, Јован Деспотовски, кој ќе се осврне на постигнатите резултати по воведувањето на новиот концепт за привлекување инвестиции.
ПРЕМИЕРА: Премиера на долгометражниот документарен филм „101 улога, 102 живота, Бајруш Мјаку“, по сценарио на Решат Камбери, и режија на Филип Херин, денеска, во Албанскиот театар во Скопје, со почеток во 19 часот.
КУЛТУРА: Во Кинотеката денеска ќе биде одржана комеморативна седница во чест на филмскиот продуцент Горјан Тозија (1954-2022).
Тозија почина ненадејно вчера во Скопје, по кратко боледување. Неговата обемна професионална биографија вбројува големи успеси на македонската кинематографија.
Тој беше филмски продуцент, поранешен државен секретар во Министерството за култура и советник во Kабинетот на претседателот Бранко Црвенковски, претседател на Друштвото на филмски работници (ДФРМ) и раководеше со продуцентската куќа „Вардар филм“.
Дел од најавите во овој текст се од сервисот на МИА.
Д. Мишев