„Им честитаме конечно на поединци во Македонија и добро е што дојде време да се поднесуваат оставки од морални причини. Тоа е добро“, изјави денеска владиниот портпарол Миле Бошњаковски, коментирајќи ги оставките во Антикорупциската комсиија.
Според Бошњаковски, треба да се почека да заврши целиот процес за да се види како ќе оди назначувањето на нови членови во Комисијата.
„Во однос на тоа како ќе продолжи, да почекаме да заврши тој процес и доколку се поднесе колективна оставка или во која било форма понатаму ќе видиме како ќе се процесира назначувањето нови членови на ова регулаторно тело“, рече Бошњаковски, одговарајќи на новинарски прашања.
По извештајот од внатрешната ревизија во Комисијата по кој уследија оставки на претседателот на ДКСК Игор Тантуровски и на членот на Комисијата Горан Миленков, денеска оставка поднесе и членот на оваа Комисија Жаклина Дамчевска.
Во извештајот се наведени сомневања за исплата на фиктивни патни налози и трошења на буџетски пари.
За извештајот на ревизорите за Антикорупциска, истрага отвори Јавното обвинителство, а парламентарното мнозинство ги повика членовите да си поднесат оставки или ќе биде иницирано нивно разрешување во Собранието.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
