Под слоганот „Борбата трае“ денеска во Северна Македонија се одбележаа 121 година од Илинденското востание и Крушевската Република и 80 години од Првото заседание на АСНОМ.
Одбележувањето се одвиваше според вообичаеното сценарио, со низа свечености и манифестациим положување на цвеќе пред спомениците на Илинденците и АСНОМ-ците, и пригодни говори главно со повици на единство.
Централната манифестација за одбележување на Илинден – Денот на Републиката се одржа во Крушево на Гумење и на месноста Мечкин Камен, каде се обрати премиерот Христијан Мицкоски.
Во 25-минутниот говор на прославата на Илинден, премиерот Христијан Мицкоски денеска од Мечкин Камен нагласи дека Македонија денес го одбележува Денот на Републиката, празник со кој се прославуваат двата големи историски и државотворни настани, Илинденското востание и Првото заседание на АСНОМ и повика на единство на граѓаните и на политичките актери за да се обезбеди напредок на земјата, но во исто време не пропушти жестоко да ја нападна опозицијата, повторувајќи ги познатите слогани за предавници, криминално богатење врз грбот на граѓаните, пустошење на државата.
Претседателката Гордана Сиљановска Давкова оствари средба со својот домаќин, српскиот претседател Александар Вучиќ со јого заедно го посетија манастирот Прихор Пчински, а потоа од Пелибце упати честитка по повод 2 Август, Илинден, истакнувајќи дека на овој празник се потсетуваме на борбата за слободна македонска република што ја започнаа Илинденците а ја продолжија учесниците во народноослободителната и антифашистичка војна.
Претседателот на Собранието Африм Гаши, положи цвеќе пред споменикот на претседателот на президиумот на АСНОМ, Методија Андонов Ченто на плоштадот „Македонија“ во Скопје, и имаше обраќање од пред Собранието на Република Северна Македонија во кое изрази убедување дека, и покрај низа предизвици ќе изнајдеме решение, сила и воља и на тој пат за да ги надминеме и час поскоро да бидеме членка на Европската унија.
Претседателот на опозициската СДСМ, Венко Филипче положи свежо цвеќе пред Методија Андонов Ченто, Споменикот на АСНОМ и Никола Карев, при што порача дека Двата Илиндена не обединуваат околу заедничката борба за просперитетна Македонија, и истакна дека слободарскиот дух на илинденците и асномците ги сплоти сите кои сакаат слобода правда и социјална еднакост.
Цвеќе пред спомен-плочата на АСНОМ во манастирот ,,Св. Прохор Пчински“ положи и делегација на Левица, предводена од претседателот на Партијата Димитар Апасиев
Цвеќе пред спомен обележјата во Крушево, Пелинце и Скопје положија и повеќе делегации, меѓу кои собраниската, делегации од Кабинетот на претседателот, политичките партии, верските заедници, локалната самоуправа, претставници на странскиот дипломатски кор.
М. Д,
